Իրանի դեսպանը չի շտապում վերադառնալ Ադրբեջան

ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Ադրբեջանում Իրանի դեսպան Մամեդբաղիր Բահրամիի Բաքու վերադառնալու ժամկետներն անհայտ են մնում: Բաքվում Իրանի դեսպանատանը նման տեղեկություններ չունեն: Այս մասին, ինչպես հաղորդում է «Արմենպրես»-ը, հայտնում է haggin.az լրատվական կայքը:

Իրանի դեսպանը խորհրդատվությունների համար հայրենիք է վերադարձել 2012 թ-ի մայիսի 21-ին: Դա տեղի է ունեցել այն բանից հետո, երբ դեսպանատան առջեւ ադրբեջանական իշխանությունների թողտվությամբ կազմակերպված բողոքի ակցիայի ժամանակ մասնակիցները Իրանի հոգեւոր առաջնորդ Ալի Խամանեին անվայել տեսքով պատկերող ցուցապաստառներ են օգտագործել եւ վիրավորական արտահայտություններ հնչեցրել նրա եւ Իրանի բարձրագույն ղեկավարության հասցեին: Իրանի ԱԳՆ-ն անդրադարձել է դրան` պահանջելով բացատրությոններ եւ ներողություն պաշտոնական Բաքվից:

Իրենց հերթին Ադրբեջանի իշխանությունները բացատրություններ եւ ներողություն են պահանջել Թեհրանից, որտեղ ցուցարարները Ադրբեջանի առաջնորդ Իլհամ Ալիեւի նկատմամբ վիրավորական պաստառներ են օգտագործել: Ադրբեջանից Իրանի դեսպանի հեռանալուց երկու օր հետո Բաքու է վերադարձել Իրանում Ադրբեջանի դեսպանը եւս, սակայն, վերջինս հետո ետ է գնացել Թեհրան: