2 წუთი კითხვის
კოლექტიური უსაფრთხოების ხელშეკრულების ორგანიზაციასთან დაკავშირებით სომხეთის ხელისუფლების ინტერესები ამოწურულია.
„არმენპრესის“ ცნობით, ამის შესახებ მთავრობაში ჟურნალისტებთან ბრიფინგზე სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რითაც უპასუხა სააგენტოს კითხვას, თუ როგორ გამოეხმაურება სომხეთი, თუ მოსკოვში დაგეგმილ კოლექტიური უსაფრთხოების საბჭოს სხდომაზე მიიღებენ გადაწყვეტილებას სომხეთის მიმართ კუხო-ს წესდების 25-ე მუხლის გამოყენების თაობაზე, კერძოდ, სომხეთისთვის კუხო-ში ხმის უფლებისა და კვოტირებულ თანამდებობებზე საკუთარი კანდიდატების წარდგენის შესაძლებლობის დროებით ჩამორთმევას.
„მე მსურს, ერთხელ და სამუდამოდ დავაფიქსიროთ: კუხო-სთან დაკავშირებით ჩვენი ინტერესები ამოწურულია“, - ხაზგასმით აღნიშნა ნიკოლ ფაშინიანმა.
კუხო-ს გენერალურმა მდივანმა თაალათბექ მასადიკოვმა 5 ნოემბერს განაცხადა, რომ სომხეთის კუხო-დან გარიცხვის საკითხი დღის წესრიგში არ დგას, თუმცა ორგანიზაციის საბჭოს მომავალ სხდომაზე შესაძლოა მიიღონ გადაწყვეტილება სომხეთის მიმართ წესდების 25-ე მუხლის გამოყენების შესახებ. კუხო-ს წესდების 25-ე მუხლის ამოქმედებით სომხეთს შეიძლება ჩამოერთვას კვოტირებული წესით ორგანიზაციის თანამდებობებზე კანდიდატების წარდგენისა და ხმის უფლება მანამ, სანამ საწევრო შენატანებისგან წარმოქმნილ დავალიანებას არ დაფარავს.
შეგახსენებთ, რომ სომხეთმა 2024 წლის თებერვლიდან გაყინა საკუთარი მონაწილეობა კუხო-ს მუშაობაში. სომხეთი არ მონაწილეობს კუხო-ს ფარგლებში გამართულ ღონისძიებებში და არც საწევრო შენატანებს იხდის.