ლეონარდო დიკაპრიომ მხარდაჭერა გამოუცხადა სომხეთისა და კოლუმბიის ინიციატივას, რომელიც საფრთხის ქვეშ მყოფი სახეობების აღდგენას ისახავს მიზნად
3 წუთი კითხვის
ჰოლივუდის მსოფლიო დონის მსახიობმა ლეონარდო დიკაპრიომ მხარი დაუჭირა სომხეთისა და კოლუმბიის ინიციატივას ერევანში დაგეგმილი COP17 კონფერენციის წინ საფრთხის ქვეშ მყოფი სახეობების აღდგენისაკენ მიმართული მოქმედებების კოალიციის (CARES) შექმნის შესახებ, რომელსაც დამფუძნებელი წევრის სტატუსით 16 ქვეყანა შეუერთდა.
„არმენპრესის“ ცნობით, ლეონარდო დიკაპრიომ თავის „ინსტაგრამის“ გვერდზე დაწერა:
„საკმარისი არ არის მხოლოდ სახეობების გადაშენების აღკვეთა, ჩვენ უნდა გადავარჩინოთ გადაშენების პირას მყოფი სახეობები და ხელი შევუწყოთ მათ აღდგენას. გაეროს ბიოლოგიური მრავალფეროვნების კონფერენციის (COP17) ფარგლებში დღეს გაკეთებული განცხადებები მოწმობს, რომ ამ მიზნის მიღწევისაკენ მიმართული საერთაშორისო ძალისხმევა სულ უფრო მეტ იმპულსს იძენს“.
მსახიობმა ხაზი გაუსვა, რომ სომხეთისა და კოლუმბიის ლიდერობით 16 ქვეყანა შეუერთდა ახალ ინიციატივას - „საფრთხის ქვეშ მყოფი სახეობების აღდგენის მოქმედებათა კოალიციას“ (CARES), რითაც აიღეს ვალდებულება, გაააქტიურონ ძალისხმევა გადაშენების თავიდან ასაცილებლად და სახეობების აღდგენის მხრივ ხელშესახები შედეგების მისაღწევად.
„9 საქველმოქმედო ფონდმა და ორგანიზაციამ, მათ შორის ჩემმა ორგანიზაცია Re:wild-მა, ჩამოაყალიბეს „სახეობათა აღდგენის ალიანსი“, რომლის ფარგლებშიც აიღეს ვალდებულება, მომავალი ხუთი წლის განმავლობაში ერთობლივად გამოყონ 500 მილიონ დოლარზე მეტი და გააერთიანონ ფინანსური რესურსები მთელ მსოფლიოში ველურ ბუნებაში გადაშენებული, კრიტიკული საფრთხის წინაშე მყოფი და გადაშენების პირას მყოფი სახეობების აღდგენის მხარდასაჭერად.
ამ ორ ცალკეულ ინიციატივას საერთო მიზანი აქვს, ხელი შეუწყოს მსოფლიოს ყველაზე მეტად საფრთხის ქვეშ მყოფი სახეობების აღდგენას. ამისათვის საჭიროა უწყვეტი ინვესტიციები, გარემოსდაცვითი ღონისძიებების კოორდინირებული განხორციელება და გრძელვადიანი ვალდებულება.
ვულოცავ დამფუძნებელ მთავრობებსა და ორგანიზაციებს“, - აღნიშნა დიკაპრიომ.