კუხოს მიმართ ინტერესი ამოწურულია, კმაყოფილი ვიქნები, თუ ორგანიზაციიდან გაგვრიცხავენ - პრემიერ-მინისტრი

სომხეთის პრემიერ-მინისტრის, ნიკოლ ფაშინიანის განცხადებით, ერევანი კოლექტიური უსაფრთხოების ხელშეკრულების ორგანიზაციაში (კუხო) თავის საქმიანობას არ გავააქტიურებს და ორგანიზაციის მიმართ ინტერესი ამოწურულია.

„არმენპრესის“ ცნობით, პრემიერ-მინისტრმა ნიკოლ ფაშინიანმა აღნიშნულ თემას ეროვნულ ასამბლეაში სომხეთის რესპუბლიკის მთავრობის 2026-2031 წლების პროგრამის განხილვისას შეეხო.

პრემიერ-მინისტრმა, მომდევნო ხუთი წლის განმავლობაში კუხო-დან სომხეთის გამოსვლის სავარაუდო შესაძლებლობის შესახებ დასმულ შეკითხვაზე საუბრისას აღნიშნა, რომ სომხეთს ორგანიზაციისგან დასმულ შეკითხვებზე არანაირი პასუხი არ მიუღია, შესაბამისად, კუხო-ს მიმართ ინტერესი ამოწურულია.

„მომდევნო 5 წლის განმავლობაში კუხო-ში დაბრუნების არანაირი გეგმა არ გვაქვს. დანამდვილებით შემიძლია ვთქვა - ჩვენ კუხო-ში ჩვენს საქმიანობას არ გავააქტიურებთ. ვიცი, რომ კუხო-ში მიმდინარეობს განხილვები და შესაძლოა ქვეყანა ორგანიზაციიდან გარიცხონ. ძალიან კმაყოფილი ვიქნები, თუ ორგანიზაცია მიიღებს გადაწყვეტილებას სომხეთის კუხო-დან გარიცხვის შესახებ. ეს გაგვათავისუფლებს გამოსვლა-არგამოსვლის დილემისგან“, - აღნიშნა ფაშინიანმა და დასძინა, რომ მთავრობის 2026-2031 წლების პროგრამაში ამ ორგანიზაციის შესახებ არცერთი მოხსენიება არ არის.

სომხეთმა 2024 წლის თებერვლიდან გაყინა თავისი მონაწილეობა კუხო-ს საქმიანობაში. სომხეთის პრემიერ-მინისტრმა ნიკოლ ფაშინიანმა ამის შესახებ France 24-ისთვის მიცემულ ინტერვიუში განაცხადა და ხაზი გაუსვა, რომ კუხო-მ სომხეთის წინაშე უსაფრთხოების სფეროში ნაკისრი ვალდებულებები არ შეასრულა.