პრემიერ-მინისტრს სომხეთ-აზერბაიჯანს შორის დამყარებული მშვიდობის ხანგრძლივად ქცევისთვის მნიშვნელოვნად მიაჩნია სოციალურ-ფსიქოლოგიური კომპონენტი

სომხეთსა და აზერბაიჯანს შორის დამყარებული მშვიდობის უქცევადად და ხანგრძლივად ქცევისთვის აუცილებელია სომხეთში მთიანი ყარაბაღის სომხების დაბრუნებისა და აზერბაიჯანიდან სომეხი ლტოლვილების დაბრუნების უფლების შესახებ, ხოლო აზერბაიჯანში „დასავლეთ აზერბაიჯანისა და დასავლეთაზერბაიჯანელების დაბრუნების უფლების“ შესახებ ნარატივების არგაგრძელება და ამ ნარატივებისთვის წერტილის დასმა.

„არმენპრესის“ ცნობით, ამის შესახებ სომხეთის პრემიერ-მინისტრმა ნიკოლ ფაშინიანმა ეროვნულ ასამბლეაში მთავრობის 2026-2031 წლების პროგრამის განხილვისას განაცხადა.

პრემიერ-მინისტრის თქმით, ერევანსა და ბაქოს შორის მშვიდობის ხანგრძლივობისთვის ასევე მნიშვნელოვანია ის, რომ როგორც სომხეთი, ისე აზერბაიჯანი უნდა შეეგუონ იმ ფაქტს, რომ დამოუკიდებელი სომხეთისა და დამოუკიდებელი აზერბაიჯანის ტერიტორიები საბჭოთა სომხეთისა და საბჭოთა აზერბაიჯანის ტერიტორიების იგივეობრივია - არც მეტი, არც ნაკლები.

„ეს არის საკითხი, რომლის მისამართებაც როგორც სომხეთში, ისე აზერბაიჯანში აუცილებელია ჩვენი თაობების მშვიდობიანი თანაცხოვრების უფლებისთვის. სომხეთისა და აზერბაიჯანის ხალხების მშვიდობა და მშვიდობიანი თანაარსებობა არის უფლება, რომელიც დღეს ჩვენ უნდა განვახორციელოთ და მივაღწიოთ და ჩვენ უნდა შევძლოთ ნებისმიერი სიტყვისა და ქმედების დაძლევა, რომელიც ამას ეწინააღმდეგება. ჩვენ უნდა შევწყვიტოთ აზერბაიჯანში სომხეთის ძებნა, აზერბაიჯანმა უნდა შეწყვიტოს სომხეთში აზერბაიჯანის ძებნა“, - გაუსვა ხაზი პრემიერ-მინისტრმა ფაშინიანმა.