სომხეთ-აზერბაიჯანის პროცესი ახლა უფრო წინ არის, ვიდრე სომხეთ-თურქეთის პროცესი - რუბინიანი

ეროვნული ასამბლეის თავმჯდომარის კანდიდატი რუბენ რუბინიანი დარწმუნებულია, რომ სომხეთ-თურქეთის ურთიერთობების სრული დარეგულირება დროის საკითხია და უკვე ძალიან ახლოსაა.

„არმენპრესის“ ინფორმაციით, რუბინიანმა ამის შესახებ ეროვნული ასამბლეის მეცხრე მოწვევის პირველ სესიაზე ფრაქცია „სომხეთის“ დეპუტატის, გეღამ მანუკიანის შეკითხვის საპასუხოდ განაცხადა.

მანუკიანმა აღნიშნა, რომ სომხეთ-თურქეთის დარეგულირების პროცესი თავიდანვე წარმოდგენილი იყო, როგორც მოლაპარაკებები წინაპირობების გარეშე, თუმცა, მისი მტკიცებით, თურქეთი პროცესის სომხეთ-აზერბაიჯანის ურთიერთობებთან ურთიერთკავშირში განხილვას განაგრძობს.

„გასული ოთხი წლის განმავლობაში თურქეთმა თავისი პოლიტიკის ყველა საკითხი აზერბაიჯანთან სომხეთის ურთიერთობების დარეგულირებით განაპირობა. ეს ადასტურებს, რომ ფორმულირება „წინაპირობების გარეშე“ რეალობას არ შეესაბამება და თურქეთი განაგრძობს სომხეთთან წინაპირობებით საუბარს, მათ შორის სომხეთზე ზეწოლის განხორციელებითაც“, - განაცხადა მანუკიანმა.

მისი თქმით, სომხეთ-თურქეთის დიპლომატიური ურთიერთობების დამყარების საკითხი კვლავ გადაუჭრელი რჩება.

შეკითხვაზე პასუხისას რუბინიანი დაეთანხმა, რომ თურქეთიდან ისმოდა და კვლავ ისმის განცხადებები, რომლებიც სომხეთ-თურქეთის დარეგულირებას სხვა პროცესებთან აკავშირებს.

„მართალი ბრძანდებით, რომ თურქეთიდან ისმოდა და ხანდახან ახლაც ისმის განცხადებები, რომლებიც სომხეთ-თურქეთის ურთიერთობების დარეგულირებას სხვა პროცესებთან აკავშირებს“, - განაცხადა მან.

რუბინიანის შეფასებით, სომხეთ-აზერბაიჯანის პროცესი ამ ეტაპზე უფრო წინ არის, ვიდრე სომხეთ-თურქეთის ურთიერთობების დარეგულირება.

„სომხეთ-აზერბაიჯანის პროცესში, მაგალითად, აზერბაიჯანულმა მხარემ უფრო ადრე გააუქმა სომხეთიდან სარკინიგზო ტრანზიტის შეზღუდვები, ვიდრე თურქეთმა. თურქეთმაც გააკეთა ეს. სომხეთსა და აზერბაიჯანს შორის ახლა პირდაპირი ვაჭრობაც არის - მხედველობაში მაქვს ნავთობპროდუქტები“, - აღნიშნა რუბინიანმა.

მისი თქმით, დროა, თურქეთმა უფრო აქტიური ნაბიჯები გადადგას სომხეთ-თურქეთის დარეგულირების პროცესში.

„მე ვერ დავასახელებ ვერავითარ მიზეზს, თუ რატომ არ უნდა ჰქონდეთ სომხეთსა და თურქეთს დიპლომატიური ურთიერთობები თუნდაც ხვალვე, და თუ რატომ არ უნდა იყოს ღია სომხეთ-თურქეთის საზღვარი თუნდაც ხვალვე“, - განაცხადა მან.

რუბინიანმა აღნიშნა, რომ პროცესი იმ სიჩქარით არ წარიმართა, რაც სომხური მხარისთვის იქნებოდა სასურველი.

„წარიმართა თუ არა პროცესი იმ სიჩქარით, რომლის ნახვაც ჩვენ ან მე გვურჩევნია? არა. მე ვისურვებდი, რომ პროცესი წლების წინ დასრულებულიყო. მაგრამ დამეთანხმეთ, რომ სომხეთ-თურქეთის პროცესი რთული პროცესი იყო და, არსებითად, სომხეთის დამოუკიდებლობის პირველი წლებიდან მოყოლებული, ყველა ხელისუფლება, მათ შორის თქვენი ხელისუფლებაც, ცდილობდა ამ პროცესის წარმატებით დასრულებას.

დარწმუნებული ვარ, რომ სომხეთ-თურქეთის სრული დარეგულირება დროის საკითხია და ეს დარეგულირება ძალიან ახლოსაა“, - დაასკვნა მან.