ევროკავშირი სომხეთის ერთ-ერთი ყველაზე საიმედო პარტნიორია - ფაშინიანი

ევროკავშირი სომხეთის ერთ-ერთი ყველაზე საიმედო პარტნიორია, ხოლო სომხეთ-ევროკავშირის ურთიერთობები დღეს ისე ახლოსაა, როგორც არასდროს.

„არმენპრესის“ ცნობით, ამის შესახებ სომხეთის პრემიერ-მინისტრმა ნიკოლ ფაშინიანმა მთავრობის ადმინისტრაციაში ევროკომისიის პრეზიდენტ ურსულა ფონ დერ ლაიენთან ერთად გამართულ პრესკონფერენციაზე განაცხადა.

მან აღნიშნა, რომ მოხარულია წლის განმავლობაში უკვე მეორედ უმასპინძლოს ევროკომისიის პრეზიდენტს სომხეთში.

„სომხეთ-ევროკავშირის თანამშრომლობის საფუძველს წარმოადგენს კომპლექსური და გაფართოებული პარტნიორობის შეთანხმება და სომხეთ-ევროკავშირის პარტნიორობის სტრატეგიული დღის წესრიგი, რომლებიც ეფუძნება დემოკრატიის, კანონის უზენაესობისა და ადამიანის უფლებათა დაცვის საერთო ღირებულებებს“, - განაცხადა მან.

ფაშინიანის თქმით, ორმხრივი შეხვედრის დროს მხარეებმა განიხილეს სომხეთის ეკონომიკის დივერსიფიკაცია და ამ მიმართულებით ევროკავშირის მხარდაჭერის სხვადასხვა მექანიზმის გამოყენების საკითხები.

სომხეთის პრემიერმა მადლობა გადაუხადა ევროკავშირს ქვეყნისთვის გამოყოფილი 52 მილიონი ევროს ოდენობის საბიუჯეტო დახმარებისთვის, ასევე ევროკავშირის წევრ ქვეყნებში სომხურ საქონელზე ავტონომიური სავაჭრო ღონისძიებების გავრცელების შესახებ პროექტის წარდგენისთვის.

„ამ გადაწყვეტილების ძალაში შესვლის შემდეგ, სომხეთი გახდება პირველი ქვეყანა, რომელსაც არ აქვს ევროკავშირის წევრობის კანდიდატის სტატუსი ან თავისუფალი ვაჭრობის შეთანხმება ორგანიზაციასთან, მაგრამ ვის მიმართაც ევროკავშირი ამ ინსტრუმენტს აამოქმედებს“, - აღნიშნა პრემიერ-მინისტრმა.

მან დასძინა, რომ სომხური მხარე იმედოვნებს, ევროკავშირთან და მის წევრ სახელმწიფოებთან აქტიური თანამშრომლობის შედეგად, რაც შეიძლება სწრაფად დასრულდება გადაწყვეტილების მიღების პროცესი, იმის გათვალისწინებით, რომ სომხეთში მოსავლის აღების სეზონი უკვე დაწყებულია.