2 წუთი კითხვის
სომხეთმა და ლიეტუვამ სტრატეგიული პარტნიორობის შესახებ დოკუმენტი გააფორმეს.
„არმენპრესის“ ცნობით, დოკუმენტს ერევანში ხელი სომხეთის საგარეო საქმეთა მინისტრმა არარატ მირზოიანმა და ლიეტუვის საგარეო საქმეთა მინისტრმა კესტუტის ბუდრისმა მოაწერეს.
შეხვედრისა და დოკუმენტის ხელმოწერის შემდეგ გამართულ პრესკონფერენციაზე, სომხეთის საგარეო უწყების ხელმძღვანელმა არარატ მირზოიანმა განაცხადა, რომ ეს არის ფორმატი, რომელიც ორ ქვეყანას შორის პოლიტიკური დიალოგისა და თანამშრომლობის გაღრმავების, აგრეთვე დარგობრივი პარტნიორობისადმი უფრო ყოვლისმომცველი მიდგომის შესაძლებლობას მისცემს.
„ორმხრივი ვიზიტები, ერთმანეთთან შეხვედრა და ჩვენს დედაქალაქებში დეტალური დისკუსიების გამართვა განსაკუთრებული შესაძლებლობაა ჩვენი პოლიტიკური დიალოგისა და თანამშრომლობის წინ წასაწევად. ეს ვიზიტი საკმაოდ სიმბოლურ დროს - ჩვენი დიპლომატიური ურთიერთობების დამყარების 35 წლისთავზე მიმდინარეობს, და სწორედ ამ პერიოდში, ყველა წინა განვითარების გათვალისწინებით, შევძელით ხელი მოგვეწერა დოკუმენტისთვის, რომლითაც ჩვენი ურთიერთობების დონე ავამაღლეთ“, - განაცხადა მირზოიანმა.
მისივე თქმით, ლიეტუველ კოლეგასთან შეხვედრისას ყურადღება გამახვილდა სამხრეთ კავკასიის რეგიონულ საკითხებსა და გეოპოლიტიკურ ვითარებაზეც.
„დღეს ჩვენ გვქონდა შესაძლებლობა განგვეხილა ეკონომიკური თანამშრომლობის პერსპექტივები, განსაკუთრებით საინფორმაციო ტექნოლოგიების, ხელოვნური ინტელექტისა და კიბერუსაფრთხოების სფეროებში, სადაც ლიეტუვას მდიდარი გამოცდილება აქვს, ჩვენ კი - გარკვეული პრაქტიკა და ცოდნა“, - აღნიშნა სომხეთის საგარეო საქმეთა მინისტრმა და დასძინა, რომ სომხეთისა და ლიეტუვის პარტნიორობა ასევე აისახება სომხეთი-ევროკავშირის ურთიერთობებსა და საერთაშორისო პლატფორმებზე.
„ჩვენ მადლობელი ვართ ჩვენი ლიეტუველი კოლეგების სომხეთი-ევროკავშირის ურთიერთობების გაღრმავების პროცესში გაწეული მხარდაჭერისთვის“, - განაცხადა მირზოიანმა.