ჩვენ შევამცირეთ პოლიტიკური, ეკონომიკური და ენერგეტიკული დამოკიდებულება ერთი ცენტრისგან - არარატ მირზოიანი

სომხეთმა ბოლო წლებში შეძლო შეემცირებინა პოლიტიკური, ეკონომიკური, ენერგეტიკული დამოკიდებულება ერთი ცენტრისგან და მოახდინა მეგობარი ქვეყნების დივერსიფიკაცია. „არმენპრესის“ ცნობით, ამის შესახებ სომხეთის საგარეო საქმეთა მინისტრმა არარატ მირზოიანმა საერთაშორისო ფორუმის „ერევნის დიალოგის“ ფარგლებში გამართულ დისკუსიაზე განაცხადა.

მირზოიანი შეეხო სომხეთის პოლიტიკური ელიტისა და საზოგადოების აზროვნებას იმის შესახებ, თუ როგორ აღიქვამდნენ ისინი სამყაროს დიდი ხნის განმავლობაში: „ათწლეულების, თუ არა საუკუნეების განმავლობაში, ჩვენ ყოველთვის ვფიქრობდით, რომ ამ მტრულ გარემოში გვჭირდებოდა ერთი ძლიერი, დიდი ძმა, მეგობარი, რომელსაც შეეძლო ჩვენი დაცვა. ეს თვალსაზრისი ახლა შეიცვალა, რადგან როდესაც დადგა დრო და ჩვენ ნამდვილად დაგვჭირდა ამ დიდი მეგობრის დაცვა, ეს დახმარება არ მოვიდა. ამან მნიშვნელოვნად შეცვალა ჩვენი მოქალაქეების, ფართო საზოგადოების ხედვა საგარეო პოლიტიკაზე, რომ აღარაფერი ვთქვათ პოლიტიკურ ელიტაზე. ახლა, როგორც ჩანს, ჩვენ გარკვეულწილად შევძელით ერთი ცენტრისგან ჩვენი პოლიტიკური, ეკონომიკური, ენერგეტიკული დამოკიდებულების შემცირება და ჩვენი მეგობრების წრის დივერსიფიკაცია“, - განაცხადა მირზოიანმა. მინისტრი გულისხმობდა იმ გარემოებას, რომ 2022 წლის სექტემბერში, როდესაც აზერბაიჯანი თავს დაესხა სომხეთის სუვერენულ ტერიტორიას, კოლექტიური უსაფრთხოების ხელშეკრულების ორგანიზაცია, რომლის წევრიც სომხეთია, და რუსეთი, რომელიც სომხეთის სტრატეგიული მოკავშირეა, სომხეთს დასახმარებლად არ მოევლინენ.

მან შეახსენა, რომ სომხეთმა დაამყარა სტრატეგიული პარტნიორობა აშშ-სთან, ევროკავშირთან, ჩინეთთან, ყაზახეთთან, აქვს მჭიდრო ურთიერთობები ინდოეთთან და ასევე ინარჩუნებს მყარ კავშირებს რუსეთთან. „ჩვენი მიზანი ამ კავშირების დივერსიფიკაციაა“, - აღნიშნა მირზოიანმა.