ფაშინიანის რწმენით, სომხეთი-ევროკავშირის სამიტი ურთიერთობებს ხარისხობრივად ახალ დონეზე აპროექტებს

სომხეთის პრემიერ-მინისტრმა ნიკოლ ფაშინიანმა სომხეთი-ევროკავშირის პირველი სამიტის ჩატარება ისტორიულ მოვლენად შეაფასა და გამოთქვა რწმენა, რომ ის სომხეთისა და ევროკავშირის ურთიერთობებს ხარისხობრივად ახალ საფეხურზე აიყვანს.

„არმენპრესის“ ცნობით, ნიკოლ ფაშინიანმა ამის შესახებ სომხეთი-ევროკავშირის სამიტის ფარგლებში ევროპული საბჭოს პრეზიდენტ ანტონიუ კოშტასთან და ევროკომისიის პრეზიდენტ ურსულა ფონ დერ ლაიენთან გაფართოებული შემადგენლობით შეხვედრაზე განაცხადა.

„როდესაც ჩვენ დღევანდელ სამიტს ორმხრივად პირველს ვუწოდებთ, ეს ნიშნავს, რომ იგულისხმება მეორე, მესამე და შემდგომი სამიტების ჩატარებაც. ვფიქრობ, აქ საკითხი მხოლოდ სახელწოდებაში არ არის, არამედ იმაში, რომ ჩვენს ურთიერთობებში უკვე ჩამოყალიბდა ისეთი წონადი დღის წესრიგი, რომლის განხილვაც მომავალში პროგნოზირებადია ჩვენი სამიტების დონეზე. რა თქმა უნდა, ეს გულისხმობს, რომ მათ შორის პერიოდებში საჭიროა საკმაოდ დეტალური და მასშტაბური მუშაობა, რაც აქამდეც კეთდებოდა“, - აღნიშნა პრემიერ-მინისტრმა.

ფაშინიანმა კმაყოფილებით აღნიშნა, რომ სამიტის ფარგლებში ვიწრო შემადგენლობით გამართულმა შეხვედრებმა აჩვენა, რომ დღის წესრიგის მრავალ საკითხზე არსებობს საერთო პოზიციები და ჩამოყალიბებული გაგება.

„ეს ნიშნავს, რომ არსებობს სათანადო ატმოსფერო, რათა ჩვენ ფოკუსირება მოვახდინოთ დღის წესრიგის განხორციელებასა და შესრულებაზე. მსურს ასევე მადლობა გადავუხადო ევროკავშირს ამ პერიოდში გაწეული მხარდაჭერისთვის, კერძოდ, დემოკრატიული და ინსტიტუციური რეფორმების სფეროში. არაერთხელ მქონია შემთხვევა მეთქვა, რომ დემოკრატია ჩვენთვის შემთხვევითი გარემოება კი არა, არამედ სტრატეგიაა, რომელიც სომხეთის ხალხის მიერ შეგნებულად, გადაწყვეტილების სახით არის მიღებული“, - ხაზგასმით აღნიშნა ფაშინიანმა.

მისი შეფასებით, ყველა ის რეფორმა, რომლის განხორციელებაც მხოლოდ პოლიტიკურ ნებაზე დაყრდნობით იყო შესაძლებელი, უკვე შესრულებულია, ხოლო მათი შემდგომი მსვლელობის უზრუნველსაყოფად საჭიროა უფრო დიდი ინსტიტუციური, საკანონმდებლო და საექსპერტო ინვესტიცია.

„ამ თვალსაზრისით, ევროკავშირთან ჩვენი თანამშრომლობა ძალიან მნიშვნელოვანია და უკვე შემიძლია მადლობა გადავუხადო ჩვენს პარტნიორებს ამ საკითხში მხარდაჭერისთვის - დაწყებული სასამართლო ხელისუფლების დამოუკიდებლობის გარანტიების საკითხებიდან, დამთავრებული ყველაზე მრავალფეროვანი, მათ შორის ჰიბრიდული გამოწვევებისადმი გაუმკლავების საკითხით, რაც, რა თქმა უნდა, ჩვენი დღის წესრიგის ნაწილია“, - დასძინა პრემიერმა და იმედი გამოთქვა, რომ ევროკავშირი დახმარებას გაუწევს დეზინფორმაციისა და სიძულვილის ენის გავრცელების პრობლემის გადაჭრაში შესაბამისი გამოცდილების გაზიარებით ან უკვე დანერგილი ინსტრუმენტების ხელმისაწვდომობის უზრუნველყოფით.