ერევანში მიმდინარე სამიტი შესაძლოა ისტორიული გახდეს საერთაშორისო მშვიდობისთვის - ნიკოლ ფაშინიანი

სომხეთის პრემიერ-მინისტრმა ნიკოლ ფაშინიანმა ევროპული პოლიტიკური საზოგადოების მე-8 სამიტის გახსნით სიტყვაში სომხეთ-აზერბაიჯანის ურთიერთობებს, რეგიონული კომუნიკაციების დებლოკირებასა და საერთაშორისო მშვიდობის პერსპექტივებს შეეხო.

„არმენპრესის“ ცნობით, პრემიერ-მინისტრმა აღნიშნა, რომ მომავალი მშვიდობის არქიტექტურა საფუძვლად დაედო ვაშინგტონში გამართულ მშვიდობის სამიტს, რომლის დროსაც, აშშ-ის პრეზიდენტ დონალდ ტრამპის მხარდაჭერით, მიღებულ იქნა მშვიდობის დეკლარაცია, ხოლო სომხეთისა და აზერბაიჯანის საგარეო საქმეთა მინისტრებმა მშვიდობისა და სახელმწიფოთაშორისი ურთიერთობების დამყარების შესახებ შეთანხმების პარაფირება მოახდინეს.

ფაშინიანის თქმით, ამჟამად მხარეები TRIPP-ის პროექტის განხორციელების მიმართულებით მოძრაობენ.

„ახლა ჩვენ მივიწევთ მნიშვნელოვანი პროექტის - „Trump Route for International Peace and Prosperity“ განხორციელებისკენ, რომელიც ხელს შეუწყობს მშვიდობის დამყარებას რეგიონული გზების დებლოკირებითა და აღმოსავლეთიდან დასავლეთისკენ და სამხრეთიდან ჩრდილოეთისკენ ახალი საერთაშორისო მარშრუტების შექმნით, რაც მნიშვნელოვან წვლილს შეიტანს საერთაშორისო მიწოდების ჯაჭვების სტაბილურობაში. ძვირფასო მეგობრებო, ახლა ჩვენ გვაქვს მშვიდობა აზერბაიჯანთან. უკვე ორი წელია, აზერბაიჯანთან ორმხრივი სროლების შედეგად დაღუპულები არ გვყოლია და ეს უპრეცედენტო წლებია ჩვენი დამოუკიდებლობის შემდეგ. ამჟამად ჩვენ მჭიდროდ ვთანამშრომლობთ აზერბაიჯანთან ჩვენს ორ ქვეყანაში მშვიდობის განსამტკიცებლად და ინსტიტუციონალიზაციისთვის“, - აღნიშნა მან.

მან დასძინა, რომ ეს ასევე არის პირველი შემთხვევა, როდესაც აზერბაიჯანის პრეზიდენტი სომხეთში გამართულ ღონისძიებაში მონაწილეობს, თუმცა ონლაინ ფორმატში.

„იმედი მაქვს, რომ 2028 წელს მექნება შესაძლებლობა ვეწვიო აზერბაიჯანს ევროპული პოლიტიკური საზოგადოების მე-10 სამიტში მონაწილეობის მისაღებად. სხვათა შორის, სომხეთმა და აზერბაიჯანმა ორმხრივად დაუჭირეს მხარი ერთმანეთის კანდიდატურებს ევროპული პოლიტიკური საზოგადოების სამიტების ჩასატარებლად“, - განაცხადა ფაშინიანმა.

ფაშინიანმა ასევე ხაზგასმით აღნიშნა, რომ სამიტი მნიშვნელოვანია საერთაშორისო კონტექსტში, მსოფლიოში არსებული გამოწვევების გათვალისწინებით - უკრაინიდან ახლო აღმოსავლეთამდე.

„რა თქმა უნდა, ეს სამიტი მნიშვნელოვანია საერთაშორისო კონტექსტშიც, განსაკუთრებით იმ პირობებში, როდესაც მსოფლიო მრავალი მზარდი გამოწვევის წინაშე დგას - უკრაინიდან ახლო აღმოსავლეთამდე. მე ვიტოვებ იმედს, რომ ჩვენი დისკუსიებისა და გადაწყვეტილებების შედეგად, ეს სამიტი შესაძლოა გახდეს ისტორიული საერთაშორისო მშვიდობისა და სტაბილურობის თვალსაზრისითაც. მე გვისურვებ წარმატებასა და სიმტკიცეს ამ მიზნის მისაღწევად - არაა აუცილებელი ერევანში, მაგრამ იმედი მაქვს, უახლოეს მომავალში“, - აღნიშნა ფაშინიანმა.

დასასრულს, პრემიერ-მინისტრმა ევროპული პოლიტიკური საზოგადოების მე-8 სამიტის ლიდერებს პროდუქტიული, შინაარსიანი და პერსპექტიული დისკუსიები უსურვა.