პრემიერ-მინისტრის პრესმდივანმა უარყო ინფორმაცია, თითქოს სომხეთი დელიმიტაციის ფარგლებში საქართველოსთვის სოფელ ჯილიზას გადაცემას აპირებს
2 წუთი კითხვის
სომხეთის პრემიერ-მინისტრის პრესმდივანმა ნაზელი ბაღდასარიანმა უარყო ზოგიერთ მედიასაშუალებაში გავრცელებული ინფორმაცია, თითქოს მიღწეულია შეთანხმება, რომლის თანახმად, სადემარკაციო პროცესის ფარგლებში სომხეთი საქართველოს გადასცემს ალავერდის თემის სოფელ ჯილიზას.
„არმენპრესის“ ცნობით, ნაზელი ბაღდასარიანმა ამის შესახებ სოციალურ ქსელ „ფეისბუქის“ საკუთარ გვერდზე დაწერა.
„რიგ მედიასაშუალებებში გავრცელდა „ინფორმაცია“, თითქოს სადელიმიტაციო პროცესის ფარგლებში მიღწეულია შეთანხმება, რომლის მიხედვითაც სომხეთი გადასცემს ალავერდის გამსხვილებული თემის სოფელ ჯილიზას.
სომხეთის რესპუბლიკის სუვერენული ტერიტორიის რომელიმე ნაწილის სხვა ქვეყნისთვის გადაცემის განზრახვის, გეგმის ან შეთანხმების შესახებ ნებისმიერი განცხადება, აზრი თუ „ინფორმაცია“ თავიდანვე არ შეესაბამება რეალობას.
შესაბამისად, როგორც ადრე, ისე ახლა და მომავალშიც, მსგავსი შინაარსის ნებისმიერ პუბლიკაციას უარვყოფდით, უარყოფთ და უარვყოფთ მათი გამოგონილი ხასიათის გამო“, - დაწერა ბაღდასარიანმა.
სომხეთის პრემიერ-მინისტრმა ნიკოლ ფაშინიანმა 27 აპრილს განაცხადა, რომ სომხეთის მთავრობის დღის წესრიგშია საქართველოსთან საზღვრის დელიმიტაციის პროცესის შეჯამებისა და დასრულების საკითხი.