ხელი მოეწერა სომხეთი-კვიპროსისა და სომხეთი-საბერძნეთი-კვიპროსის თავდაცვის სფეროში თანამშრომლობის ყოველწლიურ პროგრამებს
1 წუთი კითხვის
კვიპროსში გაიმართა სომხეთი-კვიპროსის ორმხრივი და სომხეთი-საბერძნეთი-კვიპროსის სამმხრივი თავდაცვითი კონსულტაციები, რომლებშიც მონაწილეობდა სომხეთის თავდაცვის სამინისტროს დელეგაცია თავდაცვის პოლიტიკისა და საერთაშორისო თანამშრომლობის სამმართველოს უფროსის, ლევონ აივაზიანის ხელმძღვანელობით.
როგორც „არმენპრესი“ სომხეთის თავდაცვის სამინისტროს მიერ გავრცელებულ განცხადებაზე დაყრდნობით იტყობინება, კონსულტაციების განმავლობაში მხარეებმა განიხილეს ორმხრივი და სამმხრივი ფორმატებით თანამშრომლობის მიმდინარეობა და სამომავლო გეგმები. გაიცვალა მოსაზრებები რეგიონულ და საერთაშორისო უსაფრთხოებასთან დაკავშირებულ საკითხებზე, თავდაცვის სფეროში მიმდინარე რეფორმებსა და ორმხრივი ინტერესის მქონე სხვა თემებზე.
მხარეებმა მაღალი შეფასება მისცეს ბოლო წლებში თანამშრომლობის განვითარების დინამიკას.
კონსულტაციების შედეგად, სამი ქვეყნის საერთაშორისო სამხედრო თანამშრომლობაზე პასუხისმგებელი ქვედანაყოფების ხელმძღვანელებმა ხელი მოაწერეს თავდაცვის სფეროში სომხეთი-კვიპროსის ორმხრივი და სომხეთი-საბერძნეთი-კვიპროსის სამმხრივი თანამშრომლობის ყოველწლიურ პროგრამებს.