ფაშინიანი დარწმუნებულია, რომ სომხეთსა და აზერბაიჯანს შორის საქმიანი კავშირები დამყარდება, როგორც მშვიდობის ინსტიტუციონალიზაციის მნიშვნელოვანი ინსტრუმენტი

სომხეთის რესპუბლიკის პრემიერ-მინისტრი ნიკოლ ფაშინიანი დარწმუნებულია, რომ უახლოეს მომავალში სომხეთსა და აზერბაიჯანს შორის დამყარდება საქმიანი კავშირები, რაც ორ ქვეყანას შორის მშვიდობის ინსტიტუციონალიზაციის ერთ-ერთი უმნიშვნელოვანესი საშუალება და ინსტრუმენტია.

„არმენპრესის“ ცნობით, ნიკოლ ფაშინიანმა ამის შესახებ ისაუბრა მმართველი პარტია „სამოქალაქო ხელშეკრულების“ წინასაარჩევნო პროგრამის იმ დებულების წარდგენისას, რომელიც სომხეთსა და აზერბაიჯანს შორის მშვიდობის ინსტიტუციონალიზაციას ეხება.

„სომხეთსა და აზერბაიჯანს შორის მშვიდობის ინსტიტუციონალიზაცია ჯერ კიდევ 2024 წელს დაიწყო - სომხეთის რესპუბლიკის ტავუშის მარზის მონაკვეთზე სახელმწიფო საზღვრის დელიმიტაციისა და დემარკაციის პროცესით, შემდეგ კი სომხეთისა და აზერბაიჯანის სადელიმიტაციო კომისიების ერთობლივი საქმიანობის დებულების ხელმოწერითა და რატიფიცირებით; პროცესი გაგრძელდა 2025 წლის 8 აგვისტოს სომხეთის რესპუბლიკასა და აზერბაიჯანის რესპუბლიკას შორის მშვიდობისა და სახელმწიფოთაშორისი ურთიერთობების დამყარების შესახებ შეთანხმების პარაფირებით და ვაშინგტონის დეკლარაციით მშვიდობისა და სატრანსპორტო ინფრასტრუქტურის განბლოკვის პრინციპების დადასტურებით“, - ნათქვამია მმართველი ძალის წინასაარჩევნო პროგრამაში.

მოცემული დებულების კომენტირებისას პრემიერ-მინისტრმა ნიკოლ ფაშინიანმა აღნიშნა, რომ მმართველი გუნდი აფიქსირებს მშვიდობის ინსტიტუციონალიზაციის რეალურ დაწყებას:

„კვლავ მსურს შეგახსენოთ, რომ ამას ასევე გააჩნია დე-იურე სავალდებულო სამართლებრივი საფუძველი: საუბარია სომხეთისა და აზერბაიჯანის სადელიმიტაციო სახელმწიფო კომისიების ერთობლივი საქმიანობის დებულებაზე, რომელსაც ხელი მოაწერეს ორი ქვეყნის ვიცე-პრემიერებმა, შემდეგ კი ორივე ქვეყანაში გაიარა რატიფიცირების პროცედურა და გახდა ორი ქვეყნის სამართლებრივი სისტემის განუყოფელი ნაწილი. ამ დებულებაში დაფიქსირებულია, რომ სომხეთი და აზერბაიჯანი აღიარებენ ალმა-ათის დეკლარაციას, როგორც ორ ქვეყანას შორის სადელიმიტაციო პროცესის საბაზისო პრინციპს. ეს კი თავის მხრივ ნიშნავს, რომ დამოუკიდებელი სომხეთის ტერიტორია იდენტურია საბჭოთა სომხეთის ტერიტორიისა, ხოლო დამოუკიდებელი აზერბაიჯანის ტერიტორია - საბჭოთა აზერბაიჯანის ტერიტორიისა“, - განაცხადა პრემიერმა.

ნიკოლ ფაშინიანმა ასევე წარადგინა მშვიდობის ინსტიტუციონალიზაციისთვის გადასადგმელი პრიორიტეტული ნაბიჯები.

„მშვიდობის შემდგომი ინსტიტუციონალიზაციის პრიორიტეტული ნაბიჯებია: სადელიმიტაციო პროცესის გაგრძელება; TRIPP-ის პროექტის რეალიზაცია 2025 წლის 8 აგვისტოს ვაშინგტონის დეკლარაციისა და 2026 წლის 14 იანვარს სომხეთისა და აშშ-ის მთავრობების მიერ მიღებული TRIPP-ის განხორციელების ჩარჩოს შინაარსის შესაბამისად, რაც გამოიწვევს რეგიონული საკომუნიკაციო გზების სრულ განბლოკვას; სომხეთის რესპუბლიკასა და აზერბაიჯანის რესპუბლიკას შორის მშვიდობისა და სახელმწიფოთაშორისი ურთიერთობების დამყარების შესახებ პარაფირებული შეთანხმების საბოლოო ხელმოწერა, რატიფიკაცია და მასში გათვალისწინებული ნაბიჯების შემდგომი განხორციელება“, - აღნიშნა სომხეთის პრემიერმა.

მისი თქმით, მშვიდობის ინსტიტუციონალიზაციის ჩამოთვლილი ნაბიჯები არ არის ამომწურავი: სამოქალაქო საზოგადოების, ბიზნეს წრეების წარმომადგენლების კონტაქტები, ორმხრივი ვაჭრობა, პოლიტიკური, კულტურული და ჰუმანიტარული დიალოგი მშვიდობის ინსტიტუციონალიზაციის მნიშვნელოვანი ინსტრუმენტებია და პარტია „სამოქალაქო ხელშეკრულება“ წაახალისებს და მხარს დაუჭერს ამ მიმართულებების გააქტიურებას სომხეთ-აზერბაიჯანის ურთიერთობების კონტექსტში.

„სიხარულით უნდა აღვნიშნო, რომ გარკვეული პროგრამები უკვე რეალობად იქცევა: სომხეთსა და აზერბაიჯანს შორის მცირე ნაბიჯებით მყარდება ორმხრივი ვაჭრობა, სამოქალაქო საზოგადოების წარმომადგენლების კონტაქტები უკვე კონკრეტულ კალაპოტში ჩადგა. მე მაქვს იმედი და დარწმუნებული ვარ, რომ უახლოეს მომავალში ასევე დამყარდება საქმიანი კავშირები, რაც მშვიდობის ინსტიტუციონალიზაციის ერთ-ერთი უმნიშვნელოვანესი საშუალება და ინსტრუმენტია“, - განაცხადა ფაშინიანმა.