სომხეთისა და ხორვატიის ჯანდაცვის სამინისტროები ევროკავშირის საექსპერტო მხარდაჭერის „ტვინინგის“ პროგრამას განახორციელებენ
1 წუთი კითხვის
სომხეთისა და ხორვატიის ჯანდაცვის სამინისტროები 2026 წლის 1 ივლისიდან 2028 წლის ივლისამდე ერთობლივად განახორციელებენ ევროკავშირის საექსპერტო მხარდაჭერის „ტვინინგის“ პროგრამას. პროექტის მიზანია სომხეთში ჯანმრთელობის საყოველთაო დაზღვევის სისტემის დანერგვის პროცესისა და შედეგების მონიტორინგი და მათ საფუძველზე პროფესიული მხარდაჭერის გაწევა სისტემის მუდმივი გაუმჯობესებისთვის.
„არმენპრესის“ ცნობით, ამის შესახებ ინფორმაცია სომხეთის ეროვნული ასამბლეის ევროპული ინტეგრაციის საკითხთა მუდმივმოქმედი კომისიის თავმჯდომარის, არმან ეღოიანის ფეისბუქგვერდიდან ხდება ცნობილი.
„დღეს, ხორვატიაში სომხეთის ელჩთან, აშოტ ჰოვაკიმიანთან ერთად, შევხვდით ხორვატიის ჯანდაცვის მინისტრის მოადგილეს, ტომისლავ დულიბიჩს და ხსენებული „ტვინინგის“ პროგრამის კოორდინატორს, დომაგოი დოდიგს. აზრები გავცვალეთ დანერგილი სისტემის სტრუქტურის შესახებ. კოლეგებმა ის დეტალურად შეისწავლეს და მიიჩნევენ, რომ ეს კარგი დასაწყისია ჩვენი ჯანდაცვის სისტემის ევროკავშირის სტანდარტებთან შესაბამისობაში მოყვანისთვის“, - დაწერა ეღოიანმა.