აზერბაიჯანიდან საწვავის იმპორტის შედეგად სომხეთის მოსახლეობამ ათობით მილიარდის დანაზოგი მიიღო - ფაშინიანი

აზერბაიჯანიდან სომხეთის რესპუბლიკაში ნავთობპროდუქტების იმპორტის შედეგად სომხეთის მოქალაქეებმა და მოსახლეობამ ათობით მილიარდის დანაზოგი მიიღეს.

„არმენპრესის“ ცნობით, ამის შესახებ ეროვნულ ასამბლეაში სიტყვით გამოსვლისას სომხეთის პრემიერ-მინისტრმა ნიკოლ ფაშინიანმა განაცხადა.

„აზერბაიჯანული ნავთობპროდუქტების იმპორტი არის ის ბოლო ფაქტორი, რომლის შედეგადაც ჩვენ დავასრულეთ ნავთობპროდუქტების ბაზარზე მონოპოლიის დემონტაჟის ოპერაცია, რომელიც 8 წელი გრძელდებოდა. რატომ 8 წელი? იმიტომ, რომ ჩვენ მაფიას ვებრძვით“, - განაცხადა ფაშინიანმა და ხაზი გაუსვა, რომ ეს მაფია მხოლოდ შიდასომხური არ არის და მას ზოგჯერ სხვადასხვა განშტოებები აქვს სხვა ადგილებშიც.

ნიკოლ ფაშინიანმა დასძინა, რომ ჰორმუზის სრუტის გარშემო შექმნილ კრიზისს სომხეთის მოქალაქეები და ეკონომიკა უფრო საგრძნობლად იგრძნობდნენ, რომ არა სომხეთისკენ მიმავალი აზერბაიჯანული რკინიგზის გახსნა.