კუხო-ს სომხეთის საზღვრებთან დაკავშირებით გასაკეთებელი ჰქონდა, რაც არ გააკეთა: ანდრანიკ ქოჩარიანი

სომხეთის ეროვნული ასამბლეის თავდაცვისა და უშიშროების საკითხთა მუდმივმოქმედი კომიტეტის თავმჯდომარე ანდრანიკ ქოჩარიანი არ გამორიცხავს, რომ მომავალში შესაძლოა განიხილონ სომხეთის გასვლის საკითხი კოლექტიური უსაფრთხოების ხელშეკრულების ორგანიზაციიდან. მან ხაზგასმით აღნიშნა, რომ ეს გადაწყვეტილება ქვეყნის ინტერესებზე იქნება დამოკიდებული.

„არმენპრესის“ ცნობით, ჟურნალისტის კითხვაზე - შესაძლებელია თუ არა სომხეთმა კუხო-ს დატოვება გადაწყვიტოს, ქოჩარიანმა უპასუხა:

„არასოდეს თქვა არასოდეს. სამყარო ძალიან მოუსვენარია. ჩვენი ქვეყნის უსაფრთხოებამ და სახელმწიფო ინტერესებმა უნდა უკარნახოს ჩვენი ნაბიჯების თანმიმდევრობა“.

მან აღნიშნა, რომ სომხეთისთვის კუხო-თან დაკავშირებული ძირითადი პრობლემა არა მთიან ყარაბაღს, არამედ სომხეთის საზღვრებს ეხებოდა.

„ცდილობდნენ კუხო-ს ქმედებები მთიანი ყარაბაღის ვითარებისთვის დაეკავშირებინათ, თუმცა სომხეთის საზღვრებთან დაკავშირებით კუხო-ს გასაკეთებელი ჰქონდა. ხომ არ გააკეთა? ჩვენი პრობლემა სომხეთის საზღვრებზე არსებული მდგომარეობის გამო წარმოიშვა და ჩვენ ორჯერ თუ სამჯერ მივმართეთ კუხო-ს მხარდაჭერისთვის. ამ მხარდაჭერას, სიტყვიერი განცხადებების გარდა, ჩვენთვის არანაირი შედეგი არ მოუტანია“, - განაცხადა ქოჩარიანმა.

მან დასძინა, რომ შემდგომი გადაწყვეტილებები მხოლოდ სომხეთის სახელმწიფო ინტერესებიდან გამომდინარე იქნება მიღებული. „როგორც ჩვენი ქვეყნის ინტერესი გვიკარნახებს, ისე ვიმოქმედებთ“, - აღნიშნა მან.