ნიკოლ ფაშინიანმა და რობერტა მეცოლამ სომხეთი-ევროკავშირის თანამშრომლობის განვითარების პერსპექტივები განიხილეს

სტრასბურგში სომხეთის რესპუბლიკის პრემიერ-მინისტრ ნიკოლ ფაშინიანისა და ევროპარლამენტის პრეზიდენტ რობერტა მეცოლას შეხვედრა გაიმართა.

შეხვედრამდე შედგა პრემიერ-მინისტრის დახვედრის ოფიციალური ცერემონია, რის შემდეგაც ნიკოლ ფაშინიანმა ევროპარლამენტის „ოქროს წიგნში“ ჩანაწერი გააკეთა.

„არმენპრესის“ ცნობით, სომხეთის პრემიერ-მინისტრის აპარატი იტყობინება, რომ რობერტა მეცოლა მიესალმა ნიკოლ ფაშინიანის ვიზიტს და აღნიშნა, რომ დღევანდელი შეხვედრა და პრემიერ-მინისტრ ფაშინიანის გამოსვლა მნიშვნელოვანი შესაძლებლობაა სომხეთი-ევროკავშირის ურთიერთობების შემდგომი განვითარების, ისევე როგორც სომხეთში მიმდინარე დემოკრატიული და ინსტიტუციური რეფორმების განხილვისთვის.

სომხეთის პრემიერ-მინისტრმა მადლობა გადაუხადა მოწვევისთვის და ხაზგასმით აღნიშნა, რომ სომხეთის რესპუბლიკის მთავრობა მოწოდებულია თანმიმდევრულად განავითაროს ურთიერთქმედება ევროკავშირთან. ნიკოლ ფაშინიანმა ასევე მაღალი შეფასება მისცა ევროკავშირის უწყვეტ მხარდაჭერას სომხეთში მიმდინარე რეფორმების წინსვლის პროცესში.

მოსაუბრეებმა სომხეთი-ევროკავშირის თანამშრომლობის დღის წესრიგის არაერთი საკითხი განიხილეს. საუბარი ასევე შეეხო რეგიონულ განვითარებას, რა დროსაც ხაზი გაესვა მშვიდობისა და სტაბილურობის განმტკიცებისკენ მიმართული ძალისხმევის მნიშვნელობას.