აზერბაიჯანის ტერიტორიის გავლით სომხეთში რუსული ხორბლის მორიგი პარტია გაიგზავნა

აზერბაიჯანის ტერიტორიის გავლით სომხეთში რუსული ხორბლის მორიგი პარტია გაიგზავნა.

„არმენპრესის“ ცნობით, ამის შესახებ აზერბაიჯანული სააგენტო Azertag-ი იტყობინება.

აღინიშნება, რომ ამ დროისთვის აზერბაიჯანის ტერიტორიის გავლით სარკინიგზო გზით სომხეთში გადაზიდულია 21 ათას ტონაზე მეტი ხორბალი. ამ მოცულობის ტვირთის გადასაზიდად სულ გამოყენებულ იქნა 302 ვაგონი.

ასევე ვრცელდება ინფორმაცია, რომ იმავე მარშრუტით სომხეთში გადაიზიდა 610 ტონა სასუქი.

 ბოლოს, 8 ვაგონისგან შემდგარმა სატვირთო მატარებელმა აზერბაიჯანის ტერიტორიის გავლით სომხეთში 560 ტონა რუსული ხორბალი გადაზიდა.

როგორც წინა შემთხვევებში, რუსული ხორბალი სომხეთს ამჯერადაც მიაღწევს არა მხოლოდ აზერბაიჯანის, არამედ საქართველოს ტერიტორიის გავლითაც, რადგან სომხეთსა და აზერბაიჯანს შორის პირდაპირი სარკინიგზო მიმოსვლა არ არსებობს.

აზერბაიჯანის ტერიტორიის გავლით რუსული ხორბლის პირველი პარტია სომხეთში 2025 წლის 6 ნოემბერს ჩავიდა. მაშინ სარკინიგზო გზით სომხეთში 1000 ტონა ხორბალი გადაიზიდა. 8 ნოემბერს, კვლავ აზერბაიჯანის ტერიტორიის გავლით, სომხეთში ჩავიდა ყაზახური ხორბლის პარტია - 1000 ტონა. ამის შემდეგ სომხეთის ეკონომიკის მინისტრმა, გევორგ პაპოიანმა განაცხადა, რომ აზერბაიჯანის ტერიტორიის გავლით სომხეთისთვის ხორბლის მიწოდება გაგრძელდება. რუსულმა მხარემაც განაცხადა აზერბაიჯანის ტერიტორიის გავლით სომხეთისთვის ხორბლის მიწოდების გაგრძელების შესახებ.