2 წუთი კითხვის
ჟენევაში გაეროს ადამიანის უფლებათა საბჭოს სხდომის ფარგლებში, სომხეთის საგარეო საქმეთა მინისტრი არარატ მირზოიანი გაეროს ადამიანის უფლებათა უმაღლეს კომისარს, ვოლკერ ტიურკს შეხვდა.
„არმენპრესის“ ცნობით, ამის შესახებ ინფორმაციას სომხეთის საგარეო საქმეთა სამინისტრო ავრცელებს.
არარატ მირზოიანმა და ვოლკერ ტიურკმა აზრები გაცვალეს ადამიანის უფლებათა დაცვის სფეროს პრიორიტეტებზე, ადამიანის უფლებათა საერთაშორისო სისტემის წინაშე არსებულ თანამედროვე გამოწვევებსა და ურთიერთქმედების ძირითად მიმართულებებზე.
მინისტრმა მირზოიანმა წარადგინა სომხეთის მიდგომები სომხეთსა და აზერბაიჯანს შორის დამყარებული მშვიდობის შემდგომი ინსტიტუციონალიზაციის საკითხთან დაკავშირებით. ყურადღება გამახვილდა მშვიდობის უწყვეტ განმტკიცებაზე, ნდობის ატმოსფეროს ხელშეწყობისკენ მიმართულ ნაბიჯებზე, ასევე კონფლიქტის შედეგად დაზარალებული მოსახლეობის პრობლემებისა და ჰუმანიტარული ხასიათის საკითხების მოგვარებაზე.
შეხვედრაზე ხაზი გაესვა აქტიურ თანამშრომლობას დემოკრატიული მდგრადობისა და ადამიანის უფლებათა დაცვის ინსტიტუტებისადმი ნდობის მუდმივი განმტკიცების მიმართულებით. ასევე აღინიშნა ადამიანის უფლებათა თემატიკისთვის მინიჭებული მნიშვნელობა მიმდინარე წელს სომხეთში დაგეგმილი გაეროს ბიომრავალფეროვნების შესახებ კონვენციის მხარეთა მე-17 კონფერენციის (COP17) ფარგლებში.