სომხეთი პოლონეთთან სამხედრო-ტექნიკური თანამშრომლობის შესახებ შეთანხმების ხელმოწერას გეგმავს

სომხეთის მთავრობის სხდომაზე დამტკიცდა „სომხეთის რესპუბლიკის თავდაცვის სამინისტროსა და პოლონეთის რესპუბლიკის ეროვნული თავდაცვის სამინისტროს შორის სამხედრო-ტექნიკური თანამშრომლობის შესახებ“ შეთანხმების ხელმოწერის საკითხი.

„არმენპრესის“ ცნობით, პროექტის დასაბუთების თანახმად, სომხეთი დიდ მნიშვნელობას ანიჭებს პოლონეთთან ურთიერთნდობაზე დაფუძნებული მაღალი დონის ურთიერთობების გაღრმავებას, რაც მიზნად ისახავს თავდაცვის სფეროში ხელშესახები შედეგების მიღწევასა და თანამშრომლობის მიმართულებების გაფართოებას.

აღნიშნულია, რომ ორ ქვეყანას შორის მაღალ პოლიტიკურ დონეზე რეგულარული კონტაქტები და მრავალმხრივი თანამშრომლობა მტკიცე სახელმწიფოთაშორისი კავშირების ჩამოყალიბების წინაპირობაა, განსაკუთრებით სამხედრო-ტექნიკურ სფეროში კონსტრუქციული ურთიერთქმედების განვითარების თვალსაზრისით.

სომხეთსა და პოლონეთს შორის თავდაცვის სფეროში თანამშრომლობის სამართლებრივი საფუძველია 2004 წლის 6 სექტემბერს ვარშავაში ხელმოწერილი შეთანხმება „სომხეთის რესპუბლიკის მთავრობასა და პოლონეთის რესპუბლიკის მთავრობას შორის თავდაცვის სფეროში თანამშრომლობის შესახებ“, რომელიც რატიფიცირებულია სომხეთის ეროვნული ასამბლეის მიერ 2005 წლის 21 მარტს.

ახალი შეთანხმება მიზნად ისახავს სამხედრო-ტექნიკურ სფეროში თანამშრომლობის ძირითადი პრინციპებისა და პროცედურების განსაზღვრას, რომლებიც ეფუძნება თანასწორობას, ურთიერთპატივისცემასა და ორმხრივ სარგებელს.

დოკუმენტში დაფიქსირებულია თანამშრომლობის სფეროები და ფორმები, საიდუმლო ინფორმაციის დაცვის დებულებები, მესამე ქვეყნებისთვის მიყიდვის რეგულაციები, ასევე ერთობლივი კომისიის საქმიანობის რეგლამენტი. მითითებულია აგრეთვე დავების მოგვარების, შეთანხმების ძალაში შესვლისა და შეწყვეტის მექანიზმები.

მთავრობის დასაბუთებაში ხაზგასმულია, რომ შეთანხმების ხელმოწერა სრულად შეესაბამება სომხეთის სტრატეგიულ ინტერესებს და გამომდინარეობს სომხეთის მთავრობის 2021-2026 წლების პროგრამიდან, რომელიც თავდაცვის სფეროში შეიარაღებული ძალების რეფორმირებას ითვალისწინებს.

პროექტის თანახმად, შეთანხმება ხელს შეუწყობს საერთაშორისო თავდაცვითი თანამშრომლობის გაფართოებასა და ორმხრივი ურთიერთობების შემდგომ განმტკიცებას სამხედრო-ტექნიკურ დარგში.

შეთანხმება ასევე უნდა განიხილოს და მოახდინოს მისი რატიფიცირება ეროვნულმა ასამბლეამ.