რა ეტაპზეა „ტრამპის მარშრუტი“ პროექტის განხორციელება: სომხეთის პრემიერ-მინისტრის განმარტება

სომხეთსა და ამერიკის შეერთებულ შტატებს შორის მიმდინარეობს ისეთი დოკუმენტის შემუშავება, რომელიც აღწერს „ტრამპის მარშრუტი“ პროექტის სტრატეგიულ ჩარჩოს. როგორც „არმენპრესი“ იუწყება, ამის შესახებ სომხეთის პრემიერ-მინისტრმა ნიკოლ ფაშინიანმა განაცხადა მთავრობის სხდომის შემდეგ ჟურნალისტებთან გამართულ ბრიფინგზე.

„სომხეთსა და აშშ-ს შორის მზადდება დოკუმენტი, რომელიც აღწერს „ტრამპის მარშრუტი“ პროექტის სტრატეგიულ ჩარჩოს. ამ დოკუმენტს ორივე მხარემ უნდა მისცეს ოფიციალური ფორმა, რის შემდეგაც დაიწყება შემდეგი ეტაპი. ჩემი პროგნოზი რჩება იგივე, რომ პროექტის განხორციელების პროცესი ადგილზე დავიწყდება 2026 წლის მეორე ნახევრიდან“, - განაცხადა პრემიერ-მინისტრმა.

ფაშინიანის ვარაუდით, „ტრამპის მარშრუტის“ ფარგლებში პირველი პროექტი იქნება რკინიგზის მშენებლობა.

„ვარაუდობ, რომ რკინიგზა იქნება პირველი პროექტი, თუმცა არ გამოვრიცხავ, რომ ეკონომიკურმა მიზანშეწონილობამ და საინვესტიციო მიმზიდველობამ გარკვეულად შეცვალოს პრიორიტეტები და აღმოჩნდეს, რომ გაზსადენის ან ნავთობსადენის პროექტის განხორციელება უფრო ადრეა საჭირო. თუმცა ეს მინიშნებები არ არის, ვგულისხმობ იმას, რომ პროცესი დინამიკურია და შესაძლოა გარკვეული გარემოებების გამო ნავთობის ან გაზის ინფრასტრუქტურა უფრო პრიორიტეტულად იქცეს“, - განმარტა ფაშინიანმა.

„თუმცა ამ ეტაპზე ჩვენი შეფასებით, რკინიგზა რჩება პრიორიტეტად. მისი თავისებურებაა ის, რომ მარშრუტი უკვე ცნობილია, რადგან ამ მონაკვეთზე ადრე უკვე არსებობდა რკინიგზა“, - დასძინა პრემიერ-მინისტრმა.

ფაშინიანმა ასევე განაცხადა, რომ სომხეთის მთავრობა მუშაობს სასაზღვრო და საბაჟო თანამედროვე ინფრასტრუქტურის შექმნაზე და ულტრამოდერნული ტექნიკის შეძენაზე, რომელიც გამოიყენება არა მხოლოდ სომხეთ–აზერბაიჯანის, არამედ სომხეთ–საქართველოს, სომხეთ–ირანისა და სომხეთ–თურქეთის საზღვრებზე.