საქართველოს ოპოზიციის ლიდერები გაერთიანებისა და ახალი დღის წესრიგის შემუშავების გამოწვევის წინაშე დგანან։ ჯონი მელიქიანი

ქართველოლოგი ჯონი მელიქიანის აზრით, საქართველოში შიდაპოლიტიკური მდგომარეობა მთლიანობაში სტაბილურია, მიუხედავად იმისა, რომ ოპოზიციური ძალების მიერ ორგანიზებული საპროტესტო აქციები გრძელდება, რაც უკავშირდება საპარლამენტო არჩევნების შემდგომ პერიოდში მიმდინარე პროცესების ლოგიკას․

„არმენპრესთან“ საუბარში ჯონი მელიქიანმა ისაუბრა საქართველოში არსებულ შიდაპოლიტიკურ ვითარებაზე, განსაკუთრებით 4 ოქტომბრის ცნობილი მოვლენების შემდეგ, როცა ოპოზიციონერებმა პრეზიდენტის რეზიდენციას შეუტიეს.

„აღნიშნული მოვლენები აჩვენებს, რომ ვითარება მეტნაკლებად დამშვიდებულია, მიმდინარე აქციებს ლიდერები აღარ ჰყავთ. ზოგიერთები დაკავებულები არიან, ზოგიერთებთან დაკავშირებით საქმეებია აღძრული. ხალხი ქუჩაში გამოდის, გამოხატავს თავის პროტესტს, თუმცა არ იქმნება კრიტიკული მდგომარეობა. მთავრობა თავის მხრივ აგრძელებს ნორმალურ ფუნქციონირებას. ოპოზიციის მხრიდან პრეზიდენტის რეზიდენციის შტურმმა უარყოფითი შედეგი გამოიღო, რამაც თავად ოპოზიციურ ლიდერებს შეუქმნა სირთულეები. ამიტომაც დღეს ნათლად ჩანს ოპოზიციის შიგნით არსებული კრიზისი“, - აღნიშნა მელიქიანმა․

მისი აზრით, საქართველოში ოპოზიციური ლიდერების წინაშე დგას გაერთიანების და ახალი დღის წესრიგით გამოსვლის ამოცანა, რაც განსაზღვრავს მათ საქმიანობას მომდევნო თვეებისა თუ წლების განმავლობაში, მით უმეტეს იმ პირობებში, როცა მმართველი ძალა გეგმავს გარკვეული პარტიების საქმიანობის აკრძალვას ქვეყანაში. მმართველი პარტიის, „ქართული ოცნების“, თქმით, შესაბამისი ინიციატივა უკვე მზადდება.

„საუბარია იმ პარტიებზე, რომლებიც შეიქმნა ყოფილი ხელისუფლების პერიოდში მიხეილ სააკაშვილის „ერთიანი ნაციონალური მოძრაობის“ წევრების მიერ. თუ იურიდიული პროცესი გაგრძელდა და საკონსტიტუციო სასამართლომ აკრძალა „ერთიანი ნაციონალური მოძრაობისა“ და მასთან აფილირებული პოლიტიკური ძალების საქმიანობა, ოპოზიციის კრიზისი კიდევ უფრო გაღრმავდება. შესაბამისად, 2028 წლის საპარლამენტო არჩევნების წინ იგრძნობა გარკვეული ოპოზიციური პარტიების დეფიციტი და გაჩნდება ახალი დღის წესრიგის ფორმირების მწვავე აუცილებლობა“, - აღნიშნა ექსპერტმა.

მელიქიანის შეფასებით, კრიზისშია აგრეთვე საქართველო-ევროკავშირის ურთიერთობები და საჭირო ხდება ახალი მედიაცია. „ქართული ოცნების“ მხრიდან კეთდება გარკვეული მცდელობები მდგომარეობის დეესკალაციის მიზნით. მისი თქმით, ბოლო შემთხვევა, როდესაც ფინეთის საგარეო საქმეთა მინისტრი და ეუთოს მოქმედი თავმჯდომარე შეუერთდა საპროტესტო აქციას, ხოლო საქართველოს პრემიერ-მინისტრმა ამის შემდეგ უარი თქვა მასთან შეხვედრაზე, ნათლად აჩვენებს ურთიერთობებში არსებულ კრიზისს.

ექსპერტის აზრით, საქართველოს შესაძლო დაშორება ევროკავშირისგან გამოწვევებს ქმნის და ართულებს ევროკავშირის პოლიტიკასა და დღის წესრიგს რეგიონში, ამიტომ ურთიერთობების გადახედვა ორივე მხარის ინტერესებშია.

„შეიძლება რაღაც შეიცვალოს, თუ საქართველო–აშშ-ის დიალოგი განახლდება, თუმცა გარანტია არ არსებობს, რადგან მეზობელ ქვეყანაში ძალიან რთული შიდაპოლიტიკური ვითარებაა. 2024 წლის საპარლამენტო არჩევნების შემდეგ ევროკავშირის ლიდერი შარლ მიშელი ჩაერთო საქართველოს შიდა პროცესებში, შეეცადა შუამავლის როლის შესრულებას და გარკვეულწილადაც შეამსუბუქა კრიზისი. მაგრამ დღეს მსგავსი ფიგურები ან სტრუქტურები არ ჩანს, რომლებიც საქართველოსა და ევროკავშირის ინტერესებიდან გამომდინარე შეეცდებოდნენ ხიდების აშენებას და ურთიერთობების დეესკალაციას“, - აღნიშნა მელიქიანმა.

მისი თქმით, საქართველოში გამართული ბოლო თვითმმართველობის არჩევნები, სადაც გამარჯვება მოიპოვა მმართველმა ძალამ, იყო ლოგიკური გაგრძელება წინა საპარლამენტო არჩევნებისა.

„„ქართულმა ოცნებამ“ მაქსიმალურად გააძლიერა ძალაუფლების კონსოლიდაცია ქვეყანაში, რაც თვითმმართველობის არჩევნების შემდეგაც გაგრძელდება. ეს პროცესი დემოკრატიის თვალსაზრისით შეიცავს როგორც რისკებს, ასევე შესაძლებლობებს. მეორე მხარეს დგას ოპოზიცია, რომელიც თანამშრომლობაზე არ მიდის და საკუთარი წარუმატებელი პოლიტიკით მიიყვანა სიტუაცია ამ ეტაპამდე. ოპოზიციის ლიდერების უმეტესობამ არ აღიარა საპარლამენტო არჩევნების შედეგები და ბოიკოტი გამოუცხადა თვითმმართველობის არჩევნებს, თუმცა პარტიებმა „ლელო“ და „გირჩი“ მიიღეს მონაწილეობა, რითაც არ მისცეს დანარჩენ ოპოზიციას შესაძლებლობა არჩევნების ლეგიტიმურობის საკითხის წამოწევისათვის“, - განმარტა ქართველოლოგმა.