რუბენ რუბინიანმა დეტალები გაახმოვანა უახლოეს დღეებში თურქეთის წარმომადგენელთან დაგეგმილი შეხვედრის შესახებ

სომხეთ–თურქეთის ურთიერთობების დარეგულირების პროცესში სომხეთის სპეციალურმა წარმომადგენელმა, ეროვნული ასამბლეის ვიცე-თავმჯდომარემ რუბენ რუბინიანმა დეტალები გააცნო უახლოეს დღეებში თურქეთის სპეციალურ წარმომადგენელ სერდარ ქილიჩთან დაგეგმილი შეხვედრის შესახებ.

„არმენპრესის“ ინფორმაციით, ჟურნალისტებთან ბრიფინგზე მან აღნიშნა, რომ შეხვედრაზე განიხილება სომხეთ–თურქეთის ურთიერთობების დარეგულირების პროცესის სრული დღის წესრიგი.

„გაივლება ის ნაბიჯები, რომლებიც აქამდე განხორციელდა, და ისიც, რაც ამჟამად მიმდინარეობს. იცით, რომ რამდენიმე თემა იყო განხილვის საგანი ამ წლების განმავლობაში. ჩვენს ბოლო შეხვედრას შემდეგ გაიმართა ტექნიკური პარამეტრების განხილვა ყარსი–გიუმრის სარკინიგზო ხაზის აღდგენისათვის. ეს მთელი სპექტრი იქნება განხილვის საგანი. ასევე იცით, რომ არსებობს ანის ისტორიული ხიდის აღდგენის თემა, თუმცა ძირითადი, მთავარი თემა ურთიერთობების დარეგულირებაა“, – განაცხადა რუბინიანმა.

კითხვაზე, თუ შეიძლება თუ არა სომხეთ–აზერბაიჯანის პროცესში მიღწეულმა შეთანხმებებმა სომხეთ–თურქეთის ურთიერთობებში პრაქტიკული ნაბიჯების განხორციელებას შეუწყოს ხელი, რუბინიანმა უპასუხა, რომ ვაშინგტონის დეკლარაცია ძალიან მნიშვნელოვანი მოვლენა იყო, რომელიც ერთმნიშვნელოვნად დადებითად იმოქმედებს როგორც რეგიონულ პროცესებზე, ისე ზოგადად რეგიონს მიღმაც მიმდინარე პროცესებზე.

„ამ მხრივ, დიახ, ჩვენ ოპტიმისტურად ვართ განწყობილი“, – აღნიშნა რუბინიანმა.

რაც შეეხება სომხეთ–თურქეთის საზღვრის გახსნას, რუბინიანმა აღნიშნა, რომ სწორედ ამაზეა მთელი პროცესი.

„ეს ეხება თურქეთ–სომხეთის დახურული საზღვრის გახსნას და დიპლომატიური ურთიერთობების დამყარებას. ბუნებრივია, განხილვების ძირითადი ნაწილი სწორედ ამაზეა. მართალია, მესამე ქვეყნების მოქალაქეებისა და დიპლომატიური პასპორტის მფლობელთათვის საზღვრის გახსნის შეთანხმება ამ დრომდე არ განხორციელდა, არა ჩვენი ბრალით. მაგრამ იმედი გვაქვს, რომ ის შესრულდება“, – დაასკვნა რუბინიანმა.