სომხეთ-ჩინეთის თანამშრომლობა ყველა მიმართულებით ვითარდება։ სომხეთის პრემიერ-მინისტრმა და ჩინეთის სახალხო რესპუბლიკის ვიცე-პრეზიდენტმა შეხვედრა გამართეს

პეკინში ხალხთა დიდ დარბაზში გაიმართა სომხეთის რესპუბლიკის პრემიერ-მინისტრ ნიკოლ ფაშინიანისა და ჩინეთის სახალხო რესპუბლიკის ვიცე-პრეზიდენტ ჰან ჯენის შეხვედრა.

„არმენპრესის“ ცნობით, სომხეთის რესპუბლიკის პრემიერის აპარატის მიერ გავრცელებული ინფორმაციით, ჰან ჯენმა მიესალმა ნიკოლ ფაშინიანის ვიზიტს ჩინეთში, მონაწილეობას შთო-ს სამიტში და პეკინში გამართულ აღლუმში. მისივე თქმით, სომხეთის პრემიერ-მინისტრისა და ჩინეთის პრეზიდენტ სი ძინპინის ეფექტური შეხვედრის შედეგია სომხეთსა და ჩინეთს შორის სტრატეგიული პარტნიორობის დამყარება, რაც ყველა სფეროში თანამშრომლობის განვითარებას და გაფართოებას შეუწყობს ხელს. ჰან ჯენმა ხაზგასმით აღნიშნა, რომ ჩინეთი დიდ მნიშვნელობას ანიჭებს სომხეთთან სტრატეგიული პარტნიორობის დამყარებას და პრემიერის ვიზიტს განსაკუთრებული როლი აქვს ამ პროცესში.

ნიკოლ ფაშინიანმა მადლობა გადაუხადა მოწვევისა და თბილი მიღებისთვის და აღნიშნა, რომ ჩინეთში განხორციელებული სამუშაო ვიზიტი სომხეთისთვის ძალიან მნიშვნელოვანია. პრემიერის თქმით, ვიზიტის შედეგად სომხეთ-ჩინეთის ურთიერთობები სტრატეგიული პარტნიორობის დონემდე იქნა აყვანილი, რაც ახალ შესაძლებლობებს ქმნის კავშირების შემდგომი გაღრმავებისა და გაფართოებისთვის. ფაშინიანმა ასევე აღნიშნა, რომ ბოლო წლებში თანამშრომლობა ვითარდება როგორც პოლიტიკურ, ისე ეკონომიკურ და კულტურულ სფეროებში და გამყარდა ხალხებს შორის ურთიერთობები. პრემიერის თქმით, ორივე ხალხს დიდი სიმპათია აქვს ერთმანეთის მიმართ, რაც მტკიცე საფუძველია ყოვლისმომცველი თანამშრომლობის წინსვლისთვის.

შეხვედრაზე მხარეებმა აზრები გაცვალეს საერთაშორისო მნიშვნელობის საკითხებზე და გამოთქვეს რწმენა, რომ უახლოეს პერიოდში სომხეთ-ჩინეთის თანამშრომლობა განვითარდება როგორც ორმხრივ, ასევე მრავალმხრივ დონეებზე.