2 წუთი კითხვის
სომხეთის ეროვნული უშიშროების საბჭოს ოფისი აგროვებს მედიაში კორუფციის შემთხვევების შესახებ ყველა პუბლიკაციას, ამზადებს სრულ ანგარიშს და წარუდგენს პრემიერ-მინისტრს.
როგორც „არმენპრესი“ იტყობინება, ამის შესახებ ჟურნალისტებთან ბრიფინგზე განაცხადა სომხეთის უშიშროების საბჭოს მდივანმა არმენ გრიგორიანმა.
„კორუფციის შესახებ მედიაში გამოქვეყნებული ყველა მასალა გროვდება. ჩვენი მთავარი ყურადღება, ბუნებრივია, მიმართულია მთავრობის წევრებზე, ადგილობრივ თვითმმართველ ორგანოებში მომუშავე მოქალაქეებზე. ანუ ყველა ის პუბლიკაცია, რომელსაც დიდი ალბათობით თქვენც ხედავთ, ჩვენ ვაგროვებთ და ვაწვდით პრემიერ-მინისტრს“, – განმარტა გრიგორიანმა.
კითხვაზე, რა კავშირი აქვს ეროვნული უშიშროების საბჭოს მედიაში კორუფციული შემთხვევების შესახებ პუბლიკაციების შეგროვებასთან, გრიგორიანმა აღნიშნა:
„ჩვენ კორუფციას მიგვაჩნია ეროვნული უსაფრთხოებისთვის სერიოზულ საფრთხედ. და რადგან კორუფციასთან ბრძოლა მთავრობისთვის პრიორიტეტია, უშიშროების საბჭოც ამ მიმართულებით მუშაობს“.
პრემიერ-მინისტრმა ნიკოლ ფაშინიანმა 7 მაისს ეროვნული ასამბლეაში მთავრობის წევრებთან კითხვებისა და პასუხების სესიის დროს განაცხადა, რომ არმენ გრიგორიანმა წარუდგინა მას ანგარიში მედიაში კორუფციული შემთხვევების შესახებ.