ჩვენთვის გამოსავალი ნათელია, უნდა მოვაწეროთ ხელი ხელშეკრულებას და ინსტიტუციური გზით დავასრულოთ ეს კონფლიქტი: მირზოიანი ბაირამოვს

სომხეთსა და აზერბაიჯანს აქვთ ყველა წინაპირობა, რომ ხელი მოაწერონ მშვიდობის ხელშეკრულებას, დაიწყონ დიალოგის ახალი ეტაპი და სამხრეთ კავკასიაში მშვიდობიანი ურთიერთობების ახალი ერა გახსნან.

როგორც „არმენპრესი“ იუწყება, ამის შესახებ განაცხადა სომხეთის საგარეო საქმეთა მინისტრმა არარატ მირზოიანმა ანტალიაში გამართულ პანელურ განხილვაზე, რომელშიც მონაწილეობდნენ სომხეთის, საქართველოსა და აზერბაიჯანის საგარეო საქმეთა მინისტრები.

მისი თქმით, წარსულში დაბრუნება კონსტრუქციული მიდგომა არ არის და მხარეებს არ მისცემს შესაძლებლობას ეფექტიანი განხილვების გზით კონკრეტული შედეგების მიღწევისთვის.

„მე ვამჯობინებ კონცენტრაციას მოვახდინო დღევანდელ და მომავლის რეალობებზე. თუ ისტორიულ საკითხებზე ვიფიქრებთ, ვინ ფლობდა ამა თუ იმ ტერიტორიას 100 წლის წინ ან ვინ უფრო მეტი ადამიანი მოკლა, ჩვენ ჩავშინდებით ახალ კონფლიქტში. სომხეთის მთავრობის მიზანია ჩვენს რეგიონში დამყარდეს მტკიცე და საბოლოო მშვიდობა, პირველ რიგში, სომხეთ-აზერბაიჯანის ურთიერთობების ნორმალიზების გზით. ჩვენ მივაღწიეთ მნიშვნელოვან პროგრესს მოლაპარაკებების შედეგად და შევთანხმდით მშვიდობის ხელშეკრულების ტექსტის შინაარსზე. ახლა გვსურს რაც შეიძლება მალე დავიწყოთ კონსულტაციები ხელშეკრულების ხელმოწერის ადგილისა და დროის განსაზღვრის მიზნით“, – განაცხადა მირზოიანმა.

შეესაბამება თუ არა ხელშეკრულების არსებული ტექსტი ყველა კითხვას, მირზოიანის აზრით, არა. ის დარწმუნებულია, რომ არ არსებობს მსოფლიოში არც ერთი ხელშეკრულება, რომელიც ყველა კითხვას პასუხობს. მისი თქმით, ეს მხოლოდ ურთიერთობების დასაწყისია, ხოლო სენსიტიური საკითხების გადასაჭრელად მხარეებს შეუძლიათ განაგრძონ დიალოგი და ახალი შესაძლებლობები შექმნან თანამშრომლობისთვის.

„ეს მხოლოდ დასაწყისია, და ჩვენი აზრით, უნდა ჩამოყალიბდეს კომისია, რომელიც იმუშავებს არსებულ პრობლემურ საკითხებზე. მნიშვნელოვანია, რას გადასცემენ მხარეები თავიანთ საზოგადოებებს, რას უგზავნიან სომხეთი და აზერბაიჯანი მსოფლიოს. დგება კითხვა, კვლავ ვუბრუნდებით წარსულს, თუ ვაშენებთ ერთიან და კეთილდღეობით სავსე მომავალს ჩვენი მოქალაქეებისთვის? შეხვედრისას ჯეიჰუნ ბაირამოვმა ისაუბრა გარკვეულ წინაპირობებზე. ჩვენ არაერთხელ გამოვთქვით მზადყოფნა ეუთოს მინსკის ჯგუფის ლიკვიდაციის პროცესის დასაწყებად. ამ სტრუქტურას არ აქვს ფუნქცია, თუ კონფლიქტი აღარ არსებობს. ადგილზე არ გვაქვს კონფლიქტი, თუმცა არ გვაქვს ხელმოწერილი და დოკუმენტურად დადასტურებული მშვიდობა. შეგვიძლია განვაგრძოთ დისკუსიები, მაგრამ ჩვენთვის გამოსავალი ნათელია, უნდა მოვაწეროთ ხელი ხელშეკრულებას და ინსტიტუციური გზით დავასრულოთ ეს კონფლიქტი. შეგვიძლია ხელი მოვაწეროთ ნებისმიერ დროს, წუთებში. მოდით, ბოლოს და ბოლოს მოვაწეროთ ხელი და ჩამოვაყალიბოთ ერთობლივი კომისია, როგორც უკვე ვახსენე ჩემს გამოსვლაში“, – განაცხადა მინისტრმა.

ჯეიჰუნ ბაირამოვმა თავის მხრივ კვლავ ისაუბრა სომხეთის კონსტიტუციის შეცვლის აუცილებლობაზე. პასუხად მირზოიანმა აღნიშნა, რომ სომხეთმაც შეიძლება მიმართოს აზერბაიჯანის კონსტიტუციას, თუმცა ეს არ იქნება არეკლილი და თანასწორი მიდგომა.

„დიახ, სომხეთის კონსტიტუციის პრეამბულაში არის მითითება დამოუკიდებლობის დეკლარაციაზე, მაგრამ მეზობელი ქვეყნის კონსტიტუციაშიც წერია, რომ აზერბაიჯანი ითვლება მისი წინამორბედი რესპუბლიკის სამართალმემკვიდრედ. ყველამ კარგად ვიცით, რომ აზერბაიჯანის პირველი რესპუბლიკა აცხადებს სუვერენიტეტს უფრო დიდ ტერიტორიაზე, ვიდრე თანამედროვე აზერბაიჯანია, მათ შორის მოიცავდა დამოუკიდებელი სომხეთის ტერიტორიების ნაწილსაც. აქედან გამომდინარე, კვლავ მიდგომებზეა საუბარი, რით ვიწყებთ დიალოგს. ვიწყებთ თანამშრომლობას მხოლოდ მას შემდეგ, რაც ყველა კითხვას მივიღებთ პასუხს, თუ ვეყრდნობით იმ საკითხებს, რომლებზეც უკვე გვაქვს შეთანხმება?“, – აღნიშნა მირზოიანმა.

საგარეო საქმეთა მინისტრმა ასევე აღნიშნა, რომ დღეს უნიკალური ვითარებაა, როდესაც სომხეთმა და აზერბაიჯანმა მიაღწიეს შეთანხმებას მშვიდობის ხელშეკრულების შინაარსზე, ერთმანეთის ტერიტორიული მთლიანობის აღიარებით, რაც დაფიქსირდა სსრკ-ის დაშლის შემდეგ.

„დავეყრდნობით ამ რეალობას, თუ უგულებელვყოფთ ამ ისტორიულ შანსს და მოლაპარაკების მაგიდაზე ახალ პრობლემურ საკითხებს დავდებთ? ჩემი აზრით, ამ შემთხვევაში პროცესი არასოდეს დასრულდება“, – აღნიშნა მირზოიანმა.

რაც შეეხება აზერბაიჯანის მხარის განცხადებას, თითქოს სომხეთის კონსტიტუციიდან გამომდინარეობს, რომ მთიანი ყარაბაღი სომხეთს ეკუთვნის, მირზოიანმა ოფიციალურად განაცხადა, რომ სომხეთის კონსტიტუცია ღია, საჯარო დოკუმენტია, რომლის გადამოწმებაც ნებისმიერს შეუძლია და მასში არ არის არცერთი პუნქტი, რომელიც მიუთითებს, რომ მთიანი ყარაბაღი სომხეთის ნაწილია

„რატომ აგრძელებს აზერბაიჯანის მხარე ამ საკითხზე საუბარს? განა მშვიდობის შეთანხმების ტექსტში ერთ-ერთი პუნქტი არ გულისხმობს მხარეთა მიერ ერთმანეთის ტერიტორიული მთლიანობის აღიარებას? ეს სრულიად მისაღები პოზიციაა. ასევე არსებობს მიდგომა, რომლის მიხედვითაც მხარეები ვერ გამოიყენებენ თავიანთ შიდა კანონმდებლობას, როგორც საბაბს შეთანხმების ჩავარდნის გასამართლებლად. ჩვენ მიგვაჩნია, რომ ყველა დაბრკოლების გადასალახად ყველაზე მოკლე გზა არის ხელშეკრულების ხელმოწერა და რატიფიკაცია“, – დაასრულა მირზოიანმა.