აზერბაიჯანთან კონსულტაციები მიმდინარეობს სამშვიდობო შეთანხმების ხელმოწერის მიზნით: არმენ გრიგორიანი

სომხეთი დიპლომატიური არხებით აზერბაიჯანთან კონსულტაციებს აწარმოებს სამშვიდობო შეთანხმების ხელმოწერის მიზნით.

„არმენპრესის“ ინფორმაციით, ამის შესახებ ჟურნალისტებთან ბრიფინგზე განაცხადა სომხეთის რესპუბლიკის უშიშროების საბჭოს მდივანმა არმენ გრიგორიანმა.

„ჩვენ ამჟამად აზერბაიჯანთან დიპლომატიური არხით ვმართავთ კონსულტაციებს სამშვიდობო შეთანხმების ხელმოწერის მიზნით. ვაგრძელებთ მუშაობას, რათა ხელი მოვაწეროთ შეთანხმებას, რადგან მისი ტექსტი უკვე დასრულებულია და დარჩენილია მხოლოდ ხელმოწერა“, – განაცხადა გრიგორიანმა.

მან ასევე ისაუბრა ხელმოწერის პროცესში არსებული დაბრკოლებების შესახებ, აღნიშნა, რომ აზერბაიჯანული მხარე თავის მიდგომებს აწარმოებს, ხოლო სომხური მხარე წარმოადგენს თავის მიდგომებს.

სამშვიდობო შეთანხმების ხელმოწერისთვის აზერბაიჯანმა წამოაყენა წინაპირობები, მათ შორის: ეუთოს მინსკის ჯგუფის გაუქმება და სომხეთის კონსტიტუციის შეცვლა.

არმენ გრიგორიანმა შეახსენა, რომ სომხეთი მზად არის ერთდროულად მოაწეროს ხელი როგორც სამშვიდობო შეთანხმებას, ასევე მინსკის ჯგუფის გაუქმების შესახებ განცხადებას, ხოლო კონსტიტუციის საკითხზე სომხეთის პოზიცია ცნობილია.

რაც შეეხება აზერბაიჯანის შეიარაღებული ძალების მიერ სომხური დასახლებების მიმართულებით გახსნილ ცეცხლს, გრიგორიანმა მიმართა სომხეთის თავდაცვის სამინისტროს მიერ გავრცელებულ განცხადებებს და შეახსენა, რომ სომხეთის მხრიდან ადრე გაკეთდა წინადადება ცეცხლის შეწყვეტის დარღვევის გამოძიების მექანიზმების თაობაზე.

არმენ გრიგორიანმა ასევე განაცხადა, რომ სომხეთი გააგრძელებს მუშაობას სამხედრო ესკალაციის თავიდან ასაცილებლად.