სომხეთის პრემიერ-მინისტრმა და ევროკავშირის სპეციალურმა წარმომადგენელმა აზრები გაცვალეს სომხეთ-აზერბაიჯანის სამშვიდობო პროცესის შესახებ
1 წუთი კითხვის
სომხეთის პრემიერ-მინისტრმა ნიკოლ ფაშინიანმა მიიღო სამხრეთ კავკასიისა და საქართველოს კრიზისის საკითხებში ევროკავშირის სპეციალური წარმომადგენელი მაგდალენა გრონო.
„არმენპრესის“ ინფორმაციით, სომხეთის პრემიერ-მინისტრის აპარატში აცხადებენ, რომ მოსაუბრეებმა აზრები გაცვალეს სამხრეთ კავკასიის რეგიონში არსებულ მდგომარეობასა და, კერძოდ, სომხეთ-აზერბაიჯანის სამშვიდობო პროცესის შესახებ. ორივე მხარემ ხაზგასმით აღნიშნა „სომხეთსა და აზერბაიჯანს შორის მშვიდობისა და საერთაშორისო ურთიერთობების დამყარების შესახებ“ შეთანხმების პროექტის შეჯერების მნიშვნელობა. ამასთან, ნიკოლ ფაშინიანმა აღნიშნა სომხეთის მთავრობის ერთგულება სამშვიდობო დღის წესრიგის მიმართ.
მაგდალენა გრონომ შეთანხმების ხელმოწერის მნიშვნელობა აღნიშნა და გამოთქვა რწმენა, რომ ეს ხელს შეუწყობს რეგიონში ხანგრძლივი მშვიდობისა და სტაბილურობის უზრუნველყოფას.
მხარეებმა ისაუბრეს სომხეთ-ევროკავშირის ურთიერთობების შემდგომი განვითარების შესახებ, ასევე ევროკავშირის მხარდაჭერით სომხეთში მიმდინარე დემოკრატიული რეფორმების ეფექტიანად განხორციელების საკითხებზე.