სომხეთის ეროვნული საფეხბურთო ნაკრების ახალი მთავარი მწვრთნელი ჯონ ვან’ტ სხიპია

სომხეთის ეროვნულ საფეხბურთო ნაკრებს ახალი მთავარი მწვრთნელი ჰყავს.

როგორც „არმენპრესი“ იუწყება, ამის შესახებ სფფ იტყობინება.

სომხეთის ეროვნულ ნაკრებს 61 წლის ნიდერლანდელი მწვრთნელი ჯონ ვან’ტ სხიპი უხელმძღვანელებს.

მისი ასისტენტის მოვალეობებს ნიდერლანდების ეროვნული ნაკრების ყოფილი ფეხბურთელი არონ ვინტერი შეასრულებს.

დღეს სფფ-ის პრეზიდენტმა არმენ მელიქბეკიანმა ჯონ ვან’ტ სხიპი სფფ-ის აღმასრულებელი კომიტეტის წევრებს წარუდგინა. სფფ-ის აღმასრულებელმა კომიტეტმა დაამტკიცა ვან’ტ სხიპის კანდიდატურა სომხეთის ეროვნული ნაკრების მთავარი მწვრთნელის თანამდებობაზე.

მწვრთნელი თავის მოვალეობებს 2025 წლის 1 მარტიდან შეასრულებს. კონტრაქტი 1+1 ფორმატით არის გათვალისწინებული.

ჯონ ვან’ტ სხიპი დაიბადა 1963 წლის 30 დეკემბერს.

ფეხბურთელის კარიერა

ნიდერლანდების ეროვნული ნაკრები – 41 მატჩი, 2 გოლი
1981-1992 „აიაქსი“ (ნიდერლანდები) – 273 მატჩი, 29 გოლი
1992-1996 „ჯენოა“ (იტალია) – 107 მატჩი, 11 გოლი
ფეხბურთელობისას ნიდერლანდების ეროვნული ნაკრების შემადგენლობაში 1988 წელს ევროპის ჩემპიონი გახდა. „აიაქსთან“ ერთად 4-ჯერ (1981-1982, 1982-1983, 1984-1985, 1989-1990) მოიპოვა ნიდერლანდების ჩემპიონობა, 3-ჯერ – ნიდერლანდების თასი (1982-1983, 1985-1986, 1986-1987), ასევე გახდა უეფა-ს თასების მფლობელთა თასისა (1986-1987) და უეფა-ს თასის (1991-1992) გამარჯვებული.

მწვრთნელის კარიერა

ვან’ტ სხიპი ხელმძღვანელობდა „აიაქსს“ და საბერძნეთის ეროვნულ ნაკრებს. ასევე, იყო ნიდერლანდების ეროვნული ნაკრების მთავარი მწვრთნელის მარკო ვან ბასტენის ასისტენტი. 2016 წელს, მისი ხელმძღვანელობით, ავსტრალიურმა „მელბურნ სიტიმ“ ავსტრალიის თასი მოიგო.