პრემიერ-მინისტრი ფაშინიანი აზერბაიჯანთან მოლაპარაკებების პროცესში ანკლავების საკითხს შეეხო

სომხური მხარე აზერბაიჯანთან მოლაპარაკებებში ანკლავების დღის წესრიგზე უარს ვერ იტყვის.

როგორც „არმენპრესი“ იტყობინება, ამის შესახებ სომხეთის პრემიერ-მინისტრმა ნიკოლ ფაშინიანმა 31 იანვარს გამართულ პრესკონფერენციაზე განაცხადა.

„ჩვენ ვერ დავთმობთ ანკლავების დღის წესრიგს. თუ ვიტყვი, რომ ანკლავების საკითხი არ დგას, ეს სომხეთის რესპუბლიკაში სისხლის სამართლებრივი პასუხისმგებლობის საფუძველი იქნება, რადგან სომხეთის რესპუბლიკას აქვს სუვერენული ტერიტორია – არწვაშენის სახით, რომლის თაობაზეც უარის თქმა არ შეგვიძლია“, – აღნიშნა ფაშინიანმა.

პრემიერ-მინისტრმა ასევე ხაზი გაუსვა, რომ მიუხედავად იმისა, აზერბაიჯანი აყენებს თუ არა ანკლავების საკითხს, სომხური მხარე მასზე აუცილებლად ისაუბრებს. „ვერ ავირიდებთ ამ საკითხს. ეს თემა აუცილებლად იქნება ჩვენი განხილვის არეალში და თითოეული ჩვენგანი საკუთარ არგუმენტებს წარადგენს. თეორიულად, თუ გვინდა, რომ აზერბაიჯანი ამ საკითხს საერთოდ არ შეეხოს, ამის ფასი ის იქნება, რომ ჩვენ ამ საკითხზე საერთოდ უარი ვთქვათ. მაგრამ ვინ და როგორ უნდა ამოიღოს ეს საკითხი?“, – განაცხადა ფაშინიანმა და კიდევ ერთხელ ხაზი გაუსვა, რომ ანკლავების საკითხი მოლაპარაკებების მაგიდაზე დევს.