ვიცე-პრემიერს „მშვიდობის გზაჯვარედინი“ პროექტი გადამწყვეტად მიაჩნია ენერგეტიკული რისკების განეიტრალების თვალსაზრისით

ერევანი, 18 დეკემბერი, არმენპრესი. სომხეთის მთავრობის მიერ შემუშავებულ „მშვიდობის გზაჯვარედინი“ პროექტს გადამწყვეტი მნიშვნელობა აქვს ენერგეტიკული რისკების განეიტრალებისთვის, უფრო ადეკვატური სასაქონლო, ეკონომიკური და სავაჭრო ურთიერთობების ფორმირებისათვის, აგრეთვე ამ რისკების მართვისა და საქონლის მიწოდების შესაძლებლობების უზრუნველსაყოფად.

როგორც „არმენპრესი“ იუწყება, ამის შესახებ „გამოწვევები და შესაძლებლობები 2025-ისკენ“ პანელურ დისკუსიაზე განაცხადა სომხეთის რესპუბლიკის ვიცე-პრემიერმა მჰერ გრიგორიანმა, სომხეთის მიერ განხორციელებულ დივერსიფიკაციის პოლიტიკაზე საუბრისას.

მჰერ გრიგორიანმა აღნიშნა, რომ მსოფლიოში იზოლირებული რისკები არ არსებობს და კონსოლიდირებული რისკების კუთხით უფრო პრაქტიკული იქნებოდა, თუ ამ შრეების პერიოდული განხილვა და გახსნა იქნებოდა შესაძლებელი, რადგან ყველაფერი, ჩვენი სურვილებისა თუ გემოვნების მიუხედავად, იმდენად მარტივი არ არის.

„გვაქვს ტრადიციული ურთიერთდამოკიდებულებები, რომლებიც მხოლოდ პოლიტიკური ხასიათის არ არის, რადგან 30 წლის ან თანამედროვე ისტორიის მანძილზე მოხდა როგორც ეკონომიკური, ისე ლოგისტიკური ადაპტაცია, რაც იმას ნიშნავს, რომ მკვეთრი ნაბიჯების გადადგმამდე აუცილებელია კარგად შეფასდეს, რა შედეგები შეიძლება მოჰყვეს ერთი ან მეორე კომპონენტს. ხშირად, როდესაც ვაფასებთ ენერგორესურსის ან საქონლის დეფიციტს ცალკე, ეს თითქოს მართვადი მდგომარეობაა, მაგრამ როდესაც ამ საკითხს ვიხილავთ ტრანსპორტისა და ინფრასტრუქტურის მდგომარეობის კუთხით, სრულიად განსხვავებული სურათი ჩნდება“, – აღნიშნა ვიცე-პრემიერმა.

მისი თქმით, ეს პრობლემები ხშირად ჩნდება ენერგორესურსებთან დაკავშირებითაც, რადგან საერთაშორისო ბაზრებზე ენერგორესურსის ერთი ფასია, მაგრამ შემდეგ ჩანს, რომ ლოგისტიკური ხარჯები ამ ფასს არა მხოლოდ ზრდის, არამედ ზოგჯერ შეუძლებელს ხდის მიწოდებას.

„ამ თვალსაზრისით, ვფიქრობ, რომ თუ რეგიონში გაზმომარაგების ინფრასტრუქტურას ერთად შევაფასებთ, გასათვალისწინებელია, რომ ენერგეტიკული რისკების მართვისას მნიშვნელოვანია არა მხოლოდ პროდუქტის ფასი და მისი ხელმისაწვდომობა, არამედ მისი მიწოდების შესაძლებლობებიც, რომლებიც ხშირ შემთხვევაში ფიზიკურად შეზღუდულია“, – აღნიშნა გრიგორიანმა.

მისი შეფასებით, „მშვიდობის გზაჯვარედინი“ პროექტი გადამწყვეტ როლს ასრულებს ამ რისკების განეიტრალებაში და უფრო ადეკვატური სასაქონლო, ეკონომიკური და სავაჭრო ურთიერთობების ჩამოყალიბებაში.

მჰერ გრიგორიანმა ასევე გაამახვილა ყურადღება თანამედროვე სამყაროში კონკურენტუნარიანი პროდუქციის წარმოების მნიშვნელობაზე და აღნიშნა, რომ თუ პროდუქცია ხარისხიანია, მის რეალიზაციასა და ექსპორტთან დაკავშირებული პრობლემები უბრალოდ არ არსებობს.