სომხეთის პრემიერ-მინისტრის რწმენით, მშვიდობა უსაფრთხოების ერთადერთი გარანტიაა

ერევანი, 18 სექტემბერი, არმენპრესი. სომხეთის რესპუბლიკის პრემიერ-მინისტრ ნიკოლ ფაშინიანის რწმენით, სომხეთის რესპუბლიკა უსაფრთხოების უზრუნველყოფას შეძლებს მხოლოდ იმ შემთხვევაში, თუ რეგიონში მშვიდობას შეინარჩუნებს.

როგორც „არმენპრესი“ იტყობინება, ამის შესახებ ნიკოლ ფაშინიანმა მეორე მსოფლიო სომხურ სამიტზე განაცხადა, სადაც საუბარი შეეხო სომხეთის შიდა და გარე უსაფრთხოების გარემოს.

„მსოფლიოში არ არსებობს არცერთი ქვეყანა ან სამხედრო ბლოკი, რომელიც შეძლებს უსაფრთხოების უზრუნველყოფას სომხეთის რესპუბლიკისთვის. უსაფრთხოებას მხოლოდ თავად სომხეთის რესპუბლიკა უზრუნველყოფს, თუ შეძლებს რეგიონში მშვიდობის შენარჩუნებას.

უსაფრთხოების ერთადერთი გარანტია მშვიდობაა, სხვა გარანტია არ არსებობს. ჩვენი მთავრობის პოლიტიკა სწორედ ამ გარანტიის შექმნაა, მიუხედავად იმისა, რომ ეს რთული ამოცანაა“, – განაცხადა პრემიერ-მინისტრმა.

მან აღნიშნა, რომ უსაფრთხოების კუთხით სომხეთში და მის გარშემო მიმდინარე პროცესები უფრო ფართო და გრძელვადიან პერსპექტივაში უნდა განიხილებოდეს.

პრემიერ-მინისტრის აზრით, ადრე მიღებული უსაფრთხოების არქიტექტურამ „ეფექტურობა“ აჩვენა.

„ჩვენი უსაფრთხოების არქიტექტურის აღქმა იმაში მდგომარეობდა, რომ შეგვეძლო კონფლიქტები გვქონოდა რეგიონში ყველა შესაძლო მიმართულებით, დახურული საზღვრებითა და დაძაბული ურთიერთობებით, და გვყავდა შორს ან არც ისე შორს მყოფი მოკავშირეები და მეგობრები, რომლებიც ჩვენს უკან დადგებოდნენ, რათა ჩვენთვის სასურველი ტონით გველაპარაკა. არ გვიფიქრია ან თუ გვიფიქრია, არ გვიხსენებია, რომ მოკავშირე – მოკავშირეა, მეგობარი – მეგობარი, მაგრამ ყველა ამ ქვეყანას აქვს თავისი ინტერესი და ამ კონტექსტში, თუ სომხური ფაქტორი ამ ქვეყნებისთვის მნიშვნელოვანია, ის არც პირველხარისხოვანია, არც მეორეხარისხოვანი, არც მესამეხარისხოვანი და არც მეოთხეხარისხოვანი. არ გვიფიქრია, რომ ამ არქიტექტურაში არის სტრუქტურული შეცდომა: ეს ქვეყნები, მათი ინტერესების მიხედვით, პირველ რიგში იმოქმედებენ ჩვენთან, რათა გაარკვიონ ურთიერთობები მესამე ქვეყნებთან. ვფიქრობ, როდესაც ვსაუბრობთ უსაფრთხოებაზე, პირველ რიგში, უნდა ვისაუბროთ არა იარაღზე და საბრძოლო მასალებზე, რაც ცხადია ძალიან მნიშვნელოვანია, არამედ ჩვენს გარემოში ცხოვრების წესებზე“, – ხაზი გაუსვა ფაშინიანმა.