საპარლამენტო მოსმენები გაიმართება ევროკავშირში გაწევრიანების განაცხადის წარდგენის საკითხზე რეფერენდუმის ჩატარების თემაზე

ერევანი, 17 ივნისი, არმენპრესი․ ეროვნული ასამბლეა 21 ივნისს საპარლამენტო მოსმენებს გამართავს ევროკავშირში სომხეთის გაწევრიანების განაცხადის წარდგენის საკითხზე რეფერენდუმის ჩატარების თემაზე. „არმენპრესის“ ინფორმაციით, ევროპული ინტეგრაციის საკითხების მუდმივმოქმედი კომიტეტის საპარლამენტო მოსმენების ჩატარების წინადადებით გამოვიდნენ „რესპუბლიკისთვის“ პარტიის თავმჯდომარე არმან ბაბაჯანიანი და „თავისუფალი მოქალაქის“ საზოგადოებრივი ორგანიზაციის თავმჯდომარე ჰოვსეფ ხურშუდიანი, ოთხი არასაპარლამენტო ძალის სახელით (სომხეთის ევროპული, რესპუბლიკა, რესპუბლიკისთვის, ქრისტიანულ-დემოკრატიული პარტიები).

„ევროკავშირში სომხეთის გაწევრიანებას განვიხილავთ არა მხოლოდ ცივილიზაციური ორიენტაციისა და გეოპოლიტიკური გაერთიანებისკენ შეერთების, არამედ ქვეყნის უსაფრთხოებისა და ეკონომიკის თვალსაზრისითაც. ვხედავთ, რომ უსაფრთხოების თვალსაზრისით სომხეთი უფრო მჭიდრო კავშირებს ამყარებს სწორედ ევროკავშირის წევრ ქვეყნებთან, ასევე გლობალურ დასავლეთთან, რომლის გლობალური შესავალი ჩვენთვის სწორედ ევროკავშირია.

ეკონომიკური თვალსაზრისითაც ევროკავშირი დიდი ბაზარია - 500 მილიონზე მეტი მომხმარებლით, და ამ ბაზარში უფრო დიდი როლისა და პოზიციის ქონა ჩვენს ეკონომიკის ხარისხობრივ ზრდას და ჩვენი პროდუქციის ხარისხის გაუმჯობესებას მოუტანს,“ - განაცხადა ხურშუდიანმა და დასძინა, რომ ხელისუფლებისთვისაც მნიშვნელოვანია ხალხის ხმა მოისმინოს.

არმან ბაბაჯანიანმაც თავის მხრივ აღნიშნა, რომ რეფერენდუმი მიზნად ისახავს სომხეთის გამძლეობისა და მდგრადობის გაზრდას.

„ეს რეფერენდუმი არ ნიშნავს, რომ მეორე დღესვე ევროკავშირში გაწევრიანების განაცხადს წარვადგენთ. ვფიქრობ, რომ ეს ჩვენს პოლიტიკურ გარემოს ხარისხსა და შინაარსს შესძენს, და სრულიად სხვა დისკუსიებისა და დებატების ველი გვექნება პოლიტიკურ ძალებს შორის,“ - აღნიშნა ბაბაჯანიანმა.

„სამოქალაქო შეთანხმების“ ფრაქციის დეპუტატმა სონა ღაზარიანმა მნიშვნელოვნად მიიჩნია, რომ პარლამენტში საპარლამენტო მოსმენების დროს შეფასდეს ევროკავშირში გაწევრიანების განაცხადის წარდგენის გამოწვევები.

„სამწუხაროდ, ბოლო დროს შევამჩნიე, რომ ევროკავშირში გაწევრიანება განიხილება, როგორც მხოლოდ ჩვენი ხელისუფლების ნაბიჯი ან ინიციატივა, მაგრამ მოდით, გულწრფელები ვიყოთ ამ საუბარში და ვთქვათ, რომ ევროკავშირი ერთგვაროვანი არ არის, და მონაწილეები უფრო მეტნი არიან, ვიდრე სომხეთი და ევროკავშირი. ამის მაგალითია ბოლო დროს უნგრეთის მიერ მშვიდობის ინსტრუმენტებთან დაკავშირებით უარყოფითი დამოკიდებულება. ასევე, ჩვენ დღემდე ველით ვიზების ლიბერალიზაციის დიალოგის დაწყებას, რომელიც ჩვენთვის ცნობილი მიზეზების გამო დღემდე არ მომხდარა. ამ კონტექსტში ღია საუბარი უნდა გვქონდეს“, - აღნიშნა ღაზარიანმა.

დეპუტატისთვის ასევე მნიშვნელოვანია მეზობლების შესაძლო პოზიციები და რისკები ევროკავშირში გაწევრიანების განაცხადის წარდგენის კონტექსტში.

ევროპული ინტეგრაციის საკითხების მუდმივმოქმედმა კომიტეტმა მხარი დაუჭირა ევროკავშირში სომხეთის გაწევრიანების განაცხადის წარდგენის საკითხზე რეფერენდუმის ჩატარების თემაზე საპარლამენტო მოსმენების ჩატარების წინადადებას.