სომხეთისა და საქართველოს საგარეო საქმეთა მინისტრებმა სატელეფონო საუბარი გამართეს

ერევანი, 3 ივნისი, არმენპრესი․ სომხეთის რესპუბლიკის საგარეო საქმეთა მინისტრმა არარატ მირზოიანმა 3 ივნისს სატელეფონო საუბარი გამართა საქართველოს საგარეო საქმეთა მინისტრ ილია დარჩიაშვილთან.

როგორც „არმენპრესი“ სომხეთის საგარეო საქმეთა სამინისტროს განცხადებაზე დაყრდნობით იტყობინება, საუბრისას განიხილეს ორმხრივი დღის წესრიგის საკითხები, მათ შორის, მომავალი პროექტები, რომლებიც მიზნად ისახავს ორი ქვეყნის შორის სტრატეგიული თანამშრომლობის შემდგომ გაძლიერებას.

არარატ მირზოიანმა და ილია დარჩიაშვილმა განიხილეს მრავალმხრივი დღის წესრიგის საკითხები.

სომხეთის საგარეო საქმეთა მინისტრმა კოლეგას წარუდგინა სომხეთის ტავუშისა და ლორის ოლქებში წყალდიდობის შედეგები და სტიქიური უბედურების ზონად აღიარებულ თემებში მიმდინარე სამუშაოები. საპასუხოდ, საქართველოს საგარეო საქმეთა მინისტრმა საჭიროების შემთხვევაში დახმარების მზადყოფნა გამოთქვა.