ნიკოლ ფაშინიანი ბაქოს განცხადებებს სამშვიდობო პროცესზე სერიოზულ დარტყმად მიიჩნევს

ერევანი, 13 იანვარი, არმენპრესი. სომხეთის რესპუბლიკის პრემიერ-მინისტრ ნიკოლ ფაშინიანის თქმით, ბაქოდან ბოლო დღეებში გაკეთებული განცხადებები სერიოზული დარტყმაა სამშვიდობო პროცესისთვის. „არმენპრესის“ ინფორმაციით, ამის შესახებ პრემიერ-მინისტრმა პარტია „სამოქალაქო შეთანხმების“ საინიციატივო ჯგუფის სხდომაზე განაცხადა, რომელიც ქალაქ გავარში გაიმართა.

„ჩემი აზრით, ბაქოს ბოლო განცხადებები სერიოზული დარტყმაა სამშვიდობო პროცესისთვის. რატომ, რამდენიმე მიზეზის გამო? პირველი მიზეზი არის ის, რომ, მოგეხსენებათ, ჩვენ რამდენჯერმე საჯაროდ შევთანხმდით, რომ მშვიდობა სომხეთსა და აზერბაიჯანს შორის, ისევე როგორც საზღვრის დელიმიტაცია და დემარკაცია, უნდა ეფუძნებოდეს 1991 წლის დეკემბრის ალმა-ატას დეკლარაციას. ეს ნიშნავს, რომ სომხეთი და აზერბაიჯანი აღიარებენ ერთმანეთის ტერიტორიულ მთლიანობას იმის გაგებით, რომ სომხეთის რესპუბლიკის ტერიტორია ზუსტად იმდენია, რამდენიც სომხეთის სსრ-ს ტერიტორია და აზერბაიჯანის ტერიტორია ზუსტად იმდენია, რამდენიც აზერბაიჯანის სსრ-ს ტერიტორია. ალმა-ატას დეკლარაციაში ნათქვამია, რომ საბჭოთა კავშირი დაიშალა და საბჭოთა რესპუბლიკები, რომლებიც შეუერთდნენ ალმა-ატას დეკლარაციას, მოიპოვეს დამოუკიდებლობა საკუთარი ტერიტორიებით, ხოლო საბჭოთა სახელმწიფოებს შორის ადმინისტრაციული საზღვრები სახელმწიფო საზღვრად იქცევა. ეს ნიშნავს, რომ საზღვრის დელიმიტაციის პროცესი არ არის საზღვრის შექმნა. ანუ ჩვენი დელიმიტაციის კომისიები არ უნდა წავიდნენ და საზღვარი შექმნან, არამედ უნდა განისაზღვროს ის საზღვრები, რაც არსებობდა 1991 წელს, როცა ალმა-ატას დეკლარაცია მიიღეს“, - განაცხადა პრემიერმა.

მისი თქმით, ეს შეთანხმებები სომხეთსა და აზერბაიჯანს შორის დაფიქსირდა როგორც 2022 წლის 6 ოქტომბერს პრაღაში შეხვედრის შემდეგ მიღებულ ოთხმხრივ დეკლარაციაში, ასევე იმავე თვეში სოჭში გამართულ შეხვედრაზე და ბრიუსელში 2023 წლის 15 ივლისს გამართულ შეხვედრაზე.

„რატომ მიმაჩნია აზერბაიჯანის ბოლო განცხადებები დარტყმად? იმიტომ, რომ რასაც ისინი ამბობენ უმაღლეს დონეზე პირდაპირ ეწინააღმდეგება ამ ლოგიკასა და ამ შეთანხმებას“,- თქვა ფაშინიანმა.

სომხეთის პრემიერ-მინისტრმა აღნიშნა, რომ აზერბაიჯანი ცდილობს ტერიტორიული პრეტენზიების წარმოქმნას სომხეთის მიმართ, რასაც ის აბსოლუტურად მიუღებლად მიიჩნევს.