ნიკოლ ფაშინიანმა წარმოადგინა აზერბაიჯანთან შესაძლო სამშვიდობო ხელშეკრულების პრინციპები

ერევანი, 20 დეკემბერი, არმენპრესი. აზერბაიჯანთან მომავალი მოლაპარაკებების დროს სომხეთი შეეცდება მიიღოს განმარტებები, თანახმაა თუ არა აზერბაიჯანი სამშვიდობო ხელშეკრულების ხელმოწერაზე ევროკავშირის შუამავლობით შეთანხმებული სამი პრინციპის საფუძველზე.

„არმენპრესის“ ინფორმაციით, ამის შესახებ პრემიერ-მინისტრმა ნიკოლ ფაშინიანმა ერთ-ერთი მოქალაქის შეკითხვაზე პასუხის გაცემისას განაცხადა.

„ეს სამი პრინციპი შეთანხმდა 14 მაისს და 15 ივლისს ევროკავშირის საბჭოს პრეზიდენტის, აზერბაიჯანის პრეზიდენტისა და ჩემი სამმხრივი შეხვედრების შედეგად. პირველი პრინციპი ასეთია։ სომხეთი და აზერბაიჯანი აღიარებენ ერთმანეთის ტერიტორიულ მთლიანობას, იმის გაგებით, რომ სომხეთის ტერიტორია 29800 კვადრატული კილომეტრია, ხოლო აზერბაიჯანის ტერიტორია 86600 კვადრატული კილომეტრია. მეორე პრინციპი არის ის, რომ დელიმიტაციის პროცესის პოლიტიკური საფუძველია ალმათის დეკლარაცია. ალმათის დეკლარაციის თანახმად, მას ხელმომწერმა 12 რესპუბლიკამ, მათ შორის სომხეთმა და აზერბაიჯანმა, დააფიქსირეს, რომ ამის საფუძველზე აღიარებენ ერთმანეთის ტერიტორიულ მთლიანობას, საზღვრების ხელშეუხებლობას და სუვერენიტეტს“,- თქვა პრემიერ-მინისტრმა.

მესამე პრინციპი არის რეგიონული კომუნიკაციების გახსნა, რომელიც ეფუძნება ურთიერთობისა და თანასწორობის პრინციპს, ქვეყნების იურისდიქციისა და სუვერენიტეტის პატივისცემას.

მისი თქმით, მიუხედავად იმისა, რომ აზერბაიჯანმა განაცხადა, რომ აღიარებს სომხეთის ტერიტორიულ მთლიანობას, საჭიროა დაზუსტება, თუ რას გულისხმობენ სომხეთის ტერიტორიულ მთლიანობაში. „ამ საკითხების გარკვევა არის მომავალი მოლაპარაკებების პროცესის მთავარი პრობლემა, რომლის მოგვარებაც ჩვენ უნდა შევეცადოთ“,- განაცხადა ნიკოლ ფაშინიანმა.