Պարտադիր զինվորական ծառայության մեկնեց գյումրեցի նորակոչիկների ձմեռային զորակոչի առաջին խումբը
2 րոպեի ընթերցում
ԳՅՈՒՄՐԻ, 16 ԴԵԿՏԵՄԲԵՐԻ, ԱՐՄԵՆՊՐԵՍ: Պարտադիր զինվորական ծառայության մեկնեց գյումրեցի նորակոչիկների ձմեռային զորակոչի առաջին խումբը: Գյումրու զինկոմիսարիատի նախաձեռնությամբ զորակոչիկները«Մայր Հայաստան» հուշահամալիրի տարածքից երգ ու պարով կենտրոնական հավաքակայան մեկնեցին: Խաղաղ ու անփորձանք ծառայություն մաղթելու համար հուշահամալիրի տարածքում էին նաև մարզային ու քաղաքային իշխանությունների ներկայացուցիչները, իսկ մինչ մեկնումը տղաները Գյումրու զինկոմիսարիատում անցան բժշկական վերջին բուժզննումը:
Զորակոչի առթիվ կազմակերպված միջոցառմանը մասնակցում էին Շիրակի փոխմարզպետ Վարդան Գրիգորյանը, Գյումրու քաղաքապետ Սամվել Բալասանյանը, զորակոչիկների հարազատներ ու զինվորականներ: Ընդհանուր առմամբ, Գյումրիում զորակոչի նախապատրաստական աշխատանքները կատարվել են նորմալ ու բնականոն:
Այս մասին«Արմենպրես»-ին տեղեկացրեցՇիրակի մարզի զինվորական կոմիսար, գնդապետ Արսեն Համբարձումյանը: «Այսօր մեր բոլորի համար հանդիսավոր օր է, քանի, որ մարզից նորակոչիկները մեկնում են իրենց պարտքը կատարելու, Հայաստանի Հանրապետության պետական սահմանները պաշտպանելու, ժողովրդի խաղաղությունն ու անդորրը պահպանելու»,- իր խոսքում նշեց Շիրակի մարզի զինվորական կոմիսարը։
«Այսօր Ձեզ մեծ պատիվ է ընձեռվել ծառայել Հայաստանի Հանրապետությանը՝ անցնել ծառայության ՀՀ բանակում և պաշտպանել Հայաստանի սահմանները՝ ամուր պահել դրանք: Վստահ եմ, որ ձեր շնորհիվ մեր սահմանները լինելու են ամուր և անսասան»,- նշեցՇիրակի փոխմարզպետ Վարդան Գրիգորյանը:
Տղաներին խաղաղ ծառայություն ու բարի վերադարձ մաղթեց նաև Գյումրու քաղաքապետ Սամվել Բալասանյանը:
Տերունական աղոթքից հետո նորակոչիկները ավտոբուսներ նստեցին:
Արմենուհի Մխոյան