1 րոպեի ընթերցում
ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Մարդու իրավունքների պաշտպանի աշխատակազմի արագ արձագանքման խումբը մեկնել է փաստաբան Հովհաննես Չամսարյանի փաստաբանական գրասենյակ, որտեղ գտնվում է ՀՀ ազգային անվտանգության ծառայության քննիչը՝ քրեական գործի շրջանակում փաստաբանի համակարգիչն առգրավելու նպատակով: Ինչպես տեղեկացնում է «Արմենպրես»-ը, այս մասին հայտնեցին Մարդու իրավունքների պաշտպանի աշխատակազմից:
Ազգային անվտանգության ծառայության մամուլի կենտրոնից հայտնեցին, որ դեպքի վերաբերյան մի փոքր ուշ հայտարարություն կտարածեն:
Օգտատեր Շուշան Թադևոսյանը «Ֆեյսբուք»-ի իր էջում գրել է, որ քննիչը ցանկանում է առգրավել փաստաբանՀովհաննես Չամսարյանի համակարգիչը մի քրեական գործի շրջանակներում, որտեղ վերջինս հանդես է եկել որպես վկաների ներկայացուցիչ: Նրա խոսքով` համակարգիչը պարունակում է փաստաբանական գաղտնիք, որն անձեռնամխելի է օրենքով:
Առայժմ հստակ տեղեկություններ չկան, թե քրեական որ գործի շրջանակներում է կատարվում առգրավումը, սակայն փաստաբան Չամսարյանն ակնարկել է, որ գործը կարող է կապված լինել «Աշտարակ կաթ» ընկերության հետ: