Շախմատի պատանեկան թիմի անդամները գոհ են ԱԱ-ի արդյունքներից

ԵՐԵՎԱՆ, 28ՀՈԿՏԵՄԲԵՐԻ, ԱՐՄԵՆՊՐԵՍ: Շախմատի աշխարհի երիտասարդների մինչև 18 և մինչև 20 տարեկանների առաջնության փոխչեմպիոն Շանթ Սարգսյանը գրանցած հաջողությունները կապում է մարզիչների հետ լավ աշխատանքի հետ:

«Վերջին շրջանում մրցաշարերին լավ մասնակցություն եմ ունենում, մեծ օգուտ եմ ստանում մարզիչ Վլադիմիր Հակոբյանից: Առաջիկայում մրցաշարեր չունեմ` մինչև բարձրագույն խմբի մրցաշարը, այնտեղ կփորձեմ որքան հնարավոր է լավ հանդես գալ», -«Արմենպրես»-ի մամուլի սրահում լրագրողների հետ հանդիպման ժամանակ ասաց Շանթ Սարգսյանը:

Աշխարհի Մ20 տարեկաների բրոնզե մեդալակիր Արամ Հակոբյանի խոսքով իրեն` առավել բարձր հորիզոնականներ զբաղեցնել խանգարեց 7-րդ տուրում Եվգենի Շտեմբուլիակից կրած պարտությունը: «Ավելին էի սպասում, բայց այդ մրցախաղից հետո պարզ դարձավ, որ 1-ին տեղի համար չեմ կարող պայքարել: Վատ չէի պատրաստվել, արդյունքում բրոնզե մեդալ նվաճեցի», -շեշտեց Արամ Հակոբյանը:

Մինչև 18 տարեկանների աշխարհի առաջնության բրոնզե մեդալակիր Արթուր Դավթյանը կարողացավ մեդալ նվաճել միայն վերջին 2 տուրում գրանցած հաղթանակների արդյունքում:

«Մինչև 18 տարեկանների առաջնությունն ամենասկզբից էլ լարված էր: Դժվար էր մրցանակակիր դառնալը, վերջին 2 տուրում հաղթելուց հետո կարողացա նվաճել բրոնզե մեդալ: 20 տարեկանների աշխարհի առաջնությունում կարող էի ավելի լավ հանդես գալ, սակայն 11 տուր խաղալուց հետո, չստացվեց ավելին անել», - ասաց Արթուր Դավթյանը:

Աշխարհի մինչև 20 տարեկանների երիտասարդների առաջնությունում Շանթ Սարգսյանը նվաճել էր արծաթե, իսկ Արամ Հակոբյանը բրոզնե մեդալ: Օրեր առաջ Շանթ Սարգսյանն արծաթե մեդալ էր նվաճել նաև մինչև 18 տարեկանների աշխարհի առաջնությունում, նույն մրցաշարում Արթուր Դավթյանն արժանացել էր բրոնզե մեդալի:

Հասմիկ Հակոբյան