ԲՀԿ-ն Թովմասյանի հարցով քվեարկությանը չի մասնակցում նախագծի իրավական թերությունների պատճառով
3 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովի «Բարգավաճ Հայաստան» խմբակցությունը Հրայր Թովմասյանի լիազորությունները դադարեցնելու հարցով ՍԴ դիմելու որոշման նախագծի քվեարկությանը չի մասնակցում բացառապես այն պատճառով, որ նախագիծը իրավական առումով ոչ լիարժեք է համարում: Նման որոշում կայացնելիս չեն դիտարկել Հրայր Թովմասյանի լիազորությունների և կոմպետենտության հարցը: «Արմենպրես»-ի հաղորդմամբ՝ այս մասին նախագծի քննարկմանը հայտնեց խմբակցության պատգամավոր Իվետա Տոնոյանը:
«Մենք ասել ենք, որ չենք մասնակցելու «Իմ քայլը» խմբակցության ներկայացրած նախագծի քվեարկությանը: Չենք մասնակցելու բացառապես դրա՝ իրավական առումով ոչ լիարժեք և բազմաթիվ խոցելի մասեր ունենալու հարցով պայմանավորված»,-ասաց Տոնոյանը:
Պատգամավորն առաջարկեց ծանոթանալ իրենց պատրաստած այն տեղեկանքին, որում առանձնացրել են նախագծում իրենց նկատած իրավական խութերը՝ սկսած ժամկետների խախտումից: Տոնոյանը նաև նշեց, որ նման որոշման համար նկատի են ունեցել նաև այն հանգամանքը, որ ներկայացրած լրջագույն փաստաթղթում որպես աղբյուր նշված է «Վիքիպեդիան»:
«Հրայր Թովմասյանը մեր աչքի լույսը չէ: ԲՀԿ-ից որևէ մեկը նրա երկրպագուն չէ: Եվ հենց սա վկայակոչում է այն հանգամանքը, որ մենք դեռևս 2018-ին դեմ ենք քվեարկել նրա թեկնածությանը և դրա համար ունեցել ենք մեր հիմնավոր փաստարկները: Սակայն մենք այսօր չեն մասնակցում իրավական առումով ոչ լիարժեք նախագծի քվեարկությանը և չենք դիտարկում Հրայր Թովմասյանի լիազորությունների և կոմպետենտության հարցը»,-ասաց Տոնոյանն ու հավելեց՝ եթե երբևէ որևէ կարգապահական խախտում և նմանօրինակ կարգազանցություն նկատեն, որևէ կերպ սահմանափակված չեն լինելու այդ մասին բարձրաձայնել:
Պատգամավորը նաև անդրադարձավ «Իմ քայլը» խմբակցության պատգամավորների հորդորներին՝ վերանայելու իրենց տեսակետը: «Եթե այս հարցի հետ կապված այդքան կարևոր էր խորհրդարանական կոնսենսուսը, 3 խորհրդարանական խմբակցությունների մասնակցությունը, ապա կարելի էր նախագիծը շրջանառության մեջ դնելուց առաջ հաշվի առնել խմբակցությունների կարծիքը, նախօրոք ունենալ քննարկումներ»,-ասաց Տոնոյանը:
«Բարգավաճ Հայաստան» խմբակցության ղեկավար Գագիկ Ծառուկյանն ավելի վաղ հայտնել էր, որ չեն մասնակցելու «Իմ քայլը» խմբակցության կողմից նախաձեռնված՝ Հրայր Թովմասյանի լիազորությունները դադարեցնելու հարցով ՍԴ դիմելու որոշման նախագծի քվեարկությանը: