ՀՀ արտգործնախարարն ընդգծեց Ավստրալիայում դեսպանություն բացելու կառավարության առաջնահերթությունը
1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության արտաքին գործերի նախարարությունը ծավալուն բանակցություններ է վարում Ավստրալիայում ՀՀ դեսպանություն բացելու ուղղությամբ: «Արմենպրես»-ի փոխանցմամբ՝ այս մասին ՀՀ Ազգային ժողովում կառավարության հետ հարցուպատասխանի ընթացքում ասաց արտաքին գործերի նախարար Զոհրաբ Մնացականյանը՝ պատասխանելով «Իմ քայլը» խմբակցության պատգամավոր Արման Բոշյանի հարցին:
«Այս հարցը մեր օրակարգում որոշ ժամանակ արդեն գտնվում է, և մենք բավական ծավալուն բանակցությունների մեջ ենք: Մեր նպատակն է Ավստրալիայում դեսպանություն ունենալը, և մենք շարժվում ենք ըստ գերակայությունների: Ավստրալիան մեր անմիջական գերակա ցանկի մեջ է, սակայն, որպեսզի ավելի հստակ արտահայտենք մեր նպատակների ժամանակացույցը, մեզ անհրաժեշտ է ավարտել որոշ բանակցություններ մեր գործընկերների հետ, որպեսզի մենք կարողանանք ողջամիտ ծրագիր ունենանք, բացելու համար դեսպանությունը: Մեր նպատակն է՝ որքան հնարավոր է արագ դա անել»,- ասաց նա։
Զոհրաբ Մնացականյանը դեսպանություն բացելու վերաբերյալ ժամկետներ չնշեց: