1 րոպեի ընթերցում
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: ՀՀ պաշտպանության նախարարի մամուլի խոսնակ Արծրուն Հովհաննիսյանը զորամասերում սննդի տրամադրման նոր կարգի լուսանկար է հրապարակել:
«Արմենպրես»-ի փոխանցմամբ՝ Հովհաննիսյանը լուսանկարը հրապարակել է ի հակադրություն այսօր արձանագրված ՊՆ ավտոմեքենայի կողմից սանիտարահիգիենիկ պայմանների խախտմամբ մսի տեղափոխման:
Հուլիսի 19-ին ՀՀ վարչապետ Նիկոլ Փաշինյանն այցելել է նոր կարգով սնունդ մատուցող, Արմավիրի մարզում գտնվող ՀՀ պաշտպանության նախարարության N զորամաս, որտեղ զինվորների հետ ճաշի ընթացքում անձամբ ստուգել է սննդի որակը: Ճաշելուց հետո վարչապետը նշել է, որ շատ բարձր որակի սնունդ է տրվում զինվորներին:
Հուլիսի 22-ին ՀՀ պաշտպանության նախարար Դավիթ Տոնոյանը հայտնել է, որ այժմ նոր կարգով սնունդ է մատուցվում ՀՀ զինված ուժերի 4 զորամասում, իսկ օգոստոսից դրանց թիվը կավելանա ևս մեկով: