1 րոպեի ընթերցում
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: ՀՀ քաղաքացիական ավիացիայի կոմիտեն քննարկումներ է անցկացնում ներդրողների հետ Հայաստանում օդանավերի մասերի արտադրություն կազմակերպելու համար: Քննարկվում է նաև ներդրումային ծրագիր՝ կապված օդանավերի վերանորոգման հետ:
«Արմենպրես»-ի մամուլի սրահում հրավիրված ասուլիսում այս մասին նշեց ՀՀ քաղավիացիայի կոմիտեի նախագահ Տաթևիկ Ռևազյանը:
«Ներկայում չէի ցանկանա ընկերությունների անուններ տալ, սպասենք քննարկումների ավարտին: Եթե ստացվի, ապա խոսքը 1000-ից ավելի աշխատատեղի ստեղծման մասին», -ասաց Տաթևիկ Ռևազյանը:
Լրագրողների դիտարկմանը, թե արդյոք այդ ոլորտում անհրաժեշտ մասնագետներ կա՞ն, Տաթևիկ Ռևազյանը նշեց, որ զուգահեռ պետք է լուծվի նաև այդ հարցը:
«Այսօր մեր ավիացիոն-տեխնիկական ուսումնարանը շատ վատ վիճակում է: Եթե գաք մեր շենքը տեսնեք, իրոք, կտխրեք: Համոզված չեմ, որ մեր ներդրողները հենց մեր ուսումնարանում ներդրումներ կանեն, կարող է ցանկանան որպես մասնավոր սկսել: Դա բանակցություններից հետո պարզ կլինի: Հետաքրքրություն կա օդաչուների, ինչպես նաև ինժեներների համար դպրոց բացելու հարցի նկատմամբ», - ավելացրեց Տաթևիկ Ռևազյանը: