Մխիթար Հայրապետյանը հանդիպել է Կիպրոսի նախագահի արտերկրյա և հումանիտար հարցերով հանձնակատարի հետ
1 րոպեի ընթերցում
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Ազգային ժողովի պատգամավոր, Հայաստան-Կիպրոս միջխորհրդարանական հանձնաժողովի նախագահ Մխիթար Հայրապետյանը Կիպրոսի Հանրապետության մայրաքաղաք Նիկոսիայում հանդիպել է Կիպրոսի Հանրապետության նախագահի արտերկրյա և հումանիտար հարցերով հանձնակատար Ֆոտիս Ֆոտիուի հետ:
Ինչպես «Արմենպրես»-ին հայտնեցին Մխիթար Հայրապետյանի գրասենյակից, հանդիպման ընթացքում կողմերը վերահաստատել են Հայաստան-Կիպրոս-Հունաստան եռակողմ ձևաչափ զարգացման իրենց` նախորդ տարվա հուլիսին նախանշած տեսլականը:
Մ. Հայրապետյանը Ֆ. Ֆոտիուին է ներկայացրել Ազգային ժողովում իր ղեկավարած հանձնաժողովի կողմից սփյուռքի ուղղությամբ տարվող աշխատանքները, Կառավարության կառուցվածքի փոփոխության արդյունքում ձևավորված Սփյուռքի հարցերով գլխավոր հանձնակատարի գրասենյակի ձևավորման նպատակներն ու գործունեության հիմնական ուղղությունները:
Հանդիպման ավարտին Հայրապետյանը և Ֆոտիուն պայմանավորվել են շարունակել հարաբերությունների զարգացումը` հիմքում ունենալով հայ-կիպրական բարեկամությունը, պատմական, մշակութային, քաղաքական և այլ ընդհանրությունները: