3 րոպեի ընթերցում
ԵՐԵՎԱՆ, 2 ՀՈՒԼԻՍՒ, ԱՐՄԵՆՊՐԵՍ: Կոտայքի մարզպետ Ռոմանոս Պետրոսյանն արձագանքել է Ազգային ժողովի «Իմ քայլը» խմբակցության պատգամավոր, ԵԿՄ վարչության նախագահ Սասուն Միքայելյանի դիտարկումներին, թե Աբովյանի քաղաքապետի ընտրություններում «Քաղաքացիական պայմանագիր» կուսակցությունը պարտվել է Ռոմանոս Պետրոսյանի պատճառով, քանի որ վերջինս անձնավորել է ընտրությունները: Ինչպես հաղորդում է «Արմենպրես»-ը, Ռոմանոս Պետրոսյանը «Ֆեյսբուք»-ի իր էջում կատարել է հետևյալ գրառումը.
«Ցավում եմ, բայց ազնիվ չես նախ ինքդ քո հանդեպ եւ քո իսկ անցած ուղու, ապա նաեւ՝ իմ նկատմամբ եւ իմ անմնացորդ նվիրումի՝ հանդեպ մեր «ընդհանուր» գործին։
Դե իսկ հավատարմության մասին՝ առ հեղափոխության նպատակներն ու դրա արժեքները՝ ես կլռեմ...
Աստված է բոլորիս դատավորը. ժամանակն իր գնահատականը կտա։
Մեկ անգամ չէ, որ ասել եմ՝ ինձ համար գոյություն չունեն հեղինակություններ. իմ հավատամքը Հայաստանի Հանրապետությունն է, իսկ ես կամ եւ մնալու եմ մեր պետականության, օրենքի գերակայության պետության եւ իրավահավասարության հասարակության անխոնջ զինվորը։
Լրատվամիջոցների մեր հարգարժան գործընկերներին ներողություն եմ հայտնում հարյուրից ավելի զանգերն անպատասխան թողնելու համար եւ խնդրում եմ՝ երեկվա հետ կապված հարցադրումներ չանել. այլեւս ոչ մի դիտարկում չեմ անելու, միայն գործելու եմ, եւ գործելու եմ ինչպես միշտ՝ բացառապես հանուն Հայաստանի Հանրապետության եւ նրա քաղաքացու»։
Ազգային ժողովի «Իմ քայլը» խմբակցության պատգամավոր, ԵԿՄ վարչության նախագահ Սասուն Միքայելյանը հուլիսի 1-ին լրագրողների հետ ճեպազրույցում հայտարարել էր, որ Աբովյանի քաղաքապետի ընտրություններում ՔՊ-ն պարտվել է Ռոմանոս Պետրոսյանի պատճառով, ով անձնավորել է ընտրությունները: Միքայելյանի խոսքով՝ երբ Պետրոսյանը ՔՊ-ին բերել, ներկայացրել է Աբովյանի քաղաքապետի թեկնածուին, ինքը դեմ է քվեարկել, հետո ընդհանրապես չի միջամտել ընտրություններին, պահել է ՔՊ կարգ ու կանոնը: Միքայելյանը նշել է, որ ՔՊ-ին թիկունքից չի խփել, ոչ ոքի չի հորդորել, որ ընտրեն գործող քաղաքապետին:
Աբովյանի քաղաքապետի ընտրություններից հետո Կոտայքի մարզպետ Ռոմանոս Պետրոսյանը հայտարարել էր, որ ՔՊ-ն ընտրություններում պարտվել է, քանի որ Սասուն Միքայելյանը իրենց թեկնածուին չի աջակցել: Կոտայքի մարզպետի այդ հայտարարությանը հաջորդեցին ՔՊ վարչության ընտրությունները, որի արդյունքներով Սասուն Միքայելյանը չընտրվեց կուսակցության վարչության անդամ: