Մարզային բուժհաստատություններում մոտ 200 թափուր աշխատատեղ կա. պետությունը մայրաքաղաքի բժիշկներին ժամանակավորապես կուղեգրի մարզեր
2 րոպեի ընթերցում
ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: Հայաստանի մարզային բուժհաստատություններում բժիշկ-մասնագետների պահանջարկ կա, մի շարք հաստիքներ թափուր են մնում: Առողջապահության նախարարությունը նոր ծրագրով Երևանի բուժհաստատությունների բժիշկներին ժամանակավորապես կուղարկի մարզային հիվանդանոցներ:
«Արմենպրես»-ի հաղորդմամբ` այս մասին ԱԺ առողջապահության և սոցիալական հարցերի մշտական հանձնաժողովի նիստում հայտնեցին փոխնախարարները:
«Մարզերի բժշկական հաստատություններում մոտավորապես 200 թափուր աշխատատեղ ունենք: Հիմնական թափուր տեղեր կան անեսթեզիոլոգների, ռեանիմատոլոգների համար: Մենք այդ տեղեկատվությունն օգտագործում ենք, որպեսզի պլանավորենք կլինիկական նպատակային օրդինատուրայի տեղերի հատկացումը: Կլինիկական նպատակային օրդինատուրայի տեղերը, որոնք հատկացվում են առողջապահության նախարարությանը, բավականին ավելացել են, նախորդ տարի ունեցել ենք 49 տեղ: Սակայն դա բավարար չէ, որ մեր մարզային բոլոր թափուր տեղերը լրացնենք: Այդ օրդինատորները պայմանագրեր են կնքում նախարարության հետ, ավարտելով՝ ուղեգրվում են այն մարզը, որտեղ առկա է այդ մասնագիտության թափուր տեղը, և հինգ տարի աշխատում են այնտեղ»,-ասաց ՀՀ առողջապահության փոխնախարար Լենա Նանուշյանը:
Նա նաև տեղեկացրեց, որ մեկ այլ ծրագիր ևս ունեն, որով Երևանի բժշկական հաստատություններում աշխատող բժիշկներին մինչև երեք ամսով ուղեգրելու են թափուր տեղեր:
Փոխնախարար Արսեն Դավթյանը տեղեկացրեց, որ դրա համար Երևանի որոշ բժշկական կազմակերպությունների միջև կնքվելու է քառակողմ պայմանագիր, որով տվյալ բժիշկ-մասնագետն ուղեգրվելու է մարզային բժշկական կազմակերպություն՝ աշխատանքի: «Նշված ժամանակում պահպանվում է ինչպես հիմնական աշխատանքի վայրում տրվող աշխատավարձը, այնպես էլ բժիշկը լրացուցիչ աշխատավարձ է ստանում նաև մարզային կազմակերպություններում, փոխհատուցվում է նաև գիշերակացը»,- նշեց նա:
Փոխնախարարի խոսքով` պոլիկլինիկաների հիմնական թերակատարումները կապված են հենց մարզերում մասնագետների բացակայությամբ, մարզերում կադրային ներուժի ցածր մակարդակով: