Պատգամավորն առաջարկում է բացառել գործի քննությանը մասնակցող փաստաբանի և դատախազի նկատմամբ տուգանքի կիրառումը
3 րոպեի ընթերցում
ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Ազգային ժողովի «Իմ քայլը» խմբակցության պատգամավոր Արթուր Դավթյանն առաջարկում է, որ դատավորները դատական տուգանք չկարողանան կիրառել գործի քննությանը մասնակցող դատախազի և գործի քննության կողմի ներկայացուցչի և պաշտպանի նկատմամբ:
«Արմենպրես»-ի հաղորդմամբ՝ ՀՀ քրեական, վարչական և քաղաքացիական օրենսգրքերում լրացումներ կատարելու մասին նախագիծը Դավթյանը ներկայացրեց ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում:
«Առաջարկում եմ ՀՀ 2013 թ. Վարչական դատավարության օրենսգրքի համապատասխան հոդվածը լրացնել հետևյալ բովանդակությամբ՝ դատական տուգանքը չի կարող կիրառվել գործի քննության մասնակցող դատախազի և գործի քննության՝ որպես կողմի ներկայացուցիչ կամ պաշտպան մասնակցողի նկատմամբ: Առաջարկում եմ նույն դրույթը լրացնել նաև ՀՀ Քաղաքացական և Քրեական դատավարության մասին օրենսգրքերում: Օրենքն ընդունվելու ժամանակ բացակայել է այս ներկայացված առաջարկի անհրաժեշտությունը: Դատական պրակտիկայում մենք չենք ունեցել գոնե մեկ դեպք, երբ որ խնդիր առաջանար, և դատավորի կողմից դատախազին կամ փաստաբանին տուգանեին: Նման օրենքի անհրաժեշտություն չի ունեցել ԱԺ-ն այդ ժամանակ: Մենք նաև նպատակ չունենք փաստաբանությունը վտանգելու: Այսօր գործող օրենքը թուլացնում է Հայաստանում փաստաբանությունը»,- ասաց Դավթյանը:
Նա նշեց՝ իրենց նպատակն է, որ արդար դատական համակարգ ստեղծեն: Պատգամավորը կարծում է, որ դատարանը չպետք է նման լիազորություններ ունենա և դատական նիստի ժամանակ փաստաբանին կամ դատախազին տուգանի:
Կառավարության ներկայացուցիչ, ՀՀ արդարադատության նախարար Արտակ Զեյնալյանը նշեց, որ կառավարության համար առաջարկն ընդունելի է: «Կառավարությունը, սակայն, առաջարկել է, որ պատասխանատվության ենթարկելու մասին դիմումով դատարանը դիմի գլխավոր դատախազին կամ Փաստաբանների պալատին: Եվ դա պարտադիր պայման լինի փաստաբանի կամ դատախազի նկատմամբ վարույթ հարուցելու համար»,-ընդգծեց Զեյնալյանը։
Պատգամավորներից ոմանք որոշակի դիտարկումներ ունեին նախագծի վերաբերյալ: «Իմ քայլը» խմբակցության պատգամավոր Մարիա Կարապետյանը նկատեց, որ դատավարությանը մասնակցող անձի ներկայացուցիչը երբեմն կարող է փաստաբան չլինել: Այս առումով, նրա կարծիքով, անհավասարության խնդիր է առաջանում:
Պատգամավորներից ոմանք առաջարկեցին հարցի քննարկումը հետաձգել մի քանի օրով, դրանում որոշակի լրացումներ և փոփոխություններ կատարել:
Հանձնաժողովի անդամների առաջարկով հարցի քվեարկությունը հետաձգվեց մինչև երկու ամիս՝ դրանում փոփոխություններ կատարելու նպատակով: