Մարտունի քաղաքում այս տարի կիրականացվեն մոտ 108 միլիոն դրամի ճանապարհաշինական աշխատանքներ
2 րոպեի ընթերցում
ԳԱՎԱՌ, 21 ՓԵՏՐՎԱՐԻ, ԱՐՄԵՆՊՐԵՍ : Գեղարքունիքի մարզի Մարտունի քաղաքի ճանապարհաշինական ոլորտում այս տարի կներդրվի մինչեւ 108 միլիոն դրամ, ինչի հաշվին կամբողջացվի ասֆալտապատումը Երեւանյան եւ Վարդան Մամիկոնյան փողոցներում: Տեղական միջոցներով եւ սուբվենցիոն ծրագրերի հաշվին կիրականացվեն նաեւ փողոցային լուսավորվածության ցանցի ընդարձակման աշխատանքներ: Ինչպես «Արմենպրես»-ին տեղեկացրեց Մարտունու քաղաքապետ Արմեն Ավետիսյանը՝ համայնքի ֆոնդային բյուջեում առկա 70-75 միլիոն դրամը նպատակաուղղվելու է սուբվենցիոն ծրագրերի իրականացմանը, որտեղ գերակշռություն կունենա ճանապարհաշինությունը:
«Սուբվենցիոն ծրագրերի իրականացմանը կուղղենք մեր ֆոնդային բյուջեում առկա 70-75 միլիոն դրամը, իսկ ծրագրերի իրականացման նպատակով տրվող կառավարության հատկացումներն էլ կկազմեն մոտ 50-60 միլիոն դրամ: Նպատակադրվել ենք այս տարի ամբողջովին ասֆալտապատել Երեւանյան փողոցը, որը քաղաքի գլխավոր փողոցներից մեկն է ու հատվում է Մարտունի-Գետափ միջպետական ճանապարհի հետ: Ասֆալտապատման աշխատանքներ կիրականացնենք նաեւ Վարդան Մամիկոնյան փողոցում, որի մի մասը՝ 485 մետր, անավարտ է մնացել նախորդ տարի: Որոշակի միջոցներ կնախատեսենք գիշերային լուսավորվածության ցանցի ընդարձակման համար: Առաջնահերթ խնդիր ենք համարում նաեւ քաղաքի գործող 4 մանկապարտեզի հիմնանորոգումը: Այդ նպատակով այս տարի տեղական միջոցներից հատկացնելու ենք 20-25 միլիոն դրամ՝ փոխելու բոլոր մանկապարտեզների լուսամուտները եւ դռները: Բոլոր տեղերում ամբողջովին կտեղադրվեն եվրոպատուհաններ, իսկ ներսում՝ փայտյա ստանդարտ չափերի դռներ: Իսկ մոտակա 1-2 տարվա ընթացքում ամբողջությամբ կավարտենք մանկապարտեզների ներքին ու արտաքին հարդարման, կահավորման, արդիականացման հետ կապված բոլոր աշխատանքները»,- ընդգծեց Արմեն Ավետիսյանը:
Խոսրով Խլղաթյան