2 րոպեի ընթերցում
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: Տնտեսական զարգացման և ներդրումների նախարար Տիգրան Խաչատրյանի համոզմամբ, ներդրումային բում ունենալու նպատակով ամեն ինչ ճիշտ ընթացքի մեջ է: Ինչպես փոխանցում է «Արմենպրես»-ը, կառավարության նիստից հետո լրագրողների հետ զրույցում Խաչատրյանն այդ մասին նշեց՝ պատասխանելով հարցին, թե երբ սպասել ներդրումային բում:
«Ներդրումների մասին պետք է ավելի հավասարակշռված սպասումներ ու քննարկումներ ունենալ: Ներդրումները, այո, անպայման կայունություն են սիրում, և հիմա կա կայունություն, և ես կարծում եմ, որ դա շատ նպաստավոր է լինելու առաջիկա ամիսների ծրագրերի առաջխաղացման հարցում: Իրենք նաև ժամանակ են պահանջում: Այսինքն՝ ցանկացած ներդրումային առաջարկություն իր քննարկման պահից մինչև իրականացման ավարտի պահն անցնում է որոշակի ճանապարհ»,- ասաց նա:
Ըստ նախարարի՝ տնտեսական հեղափոխությունը մեկնարկել է: «Տնտեսական հեղափոխությունը մեկնարկել է այն պահից, երբ կառավարությունն ու վարչապետը հաստատել և վերահաստատել են, որ այլևս բոլորն ազատ են իրենց գաղափարներն ու ծրագրերն իրագործելու հարցում: Եվ կառավարությունը պատրաստ է ամենայն աջակցություն իրականացնել, որպեսզի այդ ծրագրերն իրականացվեն անխափան ու անխոչընդոտ: Հեղափոխությունը չպետք է ավարտվի, պետք է շարունակվի և տա շոշափելի արդյունքներ»,- հավելեց նա: